ევროპული საქართველოს ერთ-ერთი ლიდერი, სერგი კაპანაძე, DFRlab-ის ანგარიშს ეხმაურება, სადან აღნიშნულია, რომ პროსამთავრობო მედიის და პუტინისტური დაჯგუფების, ქართული მარშის კონტენტს არაავთენტიკურ ქცევაში შემჩნეული ანგარიშების ქსელი Facebook-ის მომხმარებელთა მოტყუების გზით ავრცელებდა.

კაპანაძის თქმით, ამ კვლევაში ჩანს ის, რაც უკვე დიდი ხანია არის ცნობილი საზოგადოებისათვის, რომ ქართული ოცნება და მასთან დაკავშირებული მედია რესურსები აქტიურად და კოორდინირებულად თანამშრომლობენ ანტიდასავლური პროპაგანდის გამტარებელ ჯგუფებთან.

კაპანაძემ აღნიშნა, რომ ამგვარი გვერდების იდენტიფიცირება არის კიდევ ერთი გზა, რათა ყველა ერთად ებრძოლოს ქართული ოცნების ძალიან მავნებლურ და ქვეყნის ინტერესების საწინააღმდეგო პროპაგანდას.

„ამ კვლევაში ჩანს ის, რაც დიდი ხანია უკვე ცნობილია, რაზეც ოპოზიციური პარტიები, ევროპული საქართველო მათ შორის დიდი ხანია საუბრობს, რაც მანამდე Facebook-მა და სხვა ორგანიზაციებმაც ბევრჯერ გამოაქვეყნეს, რომ ქართული ოცნება, მასთან დაკავშირებული მედია რესურსები Facebook-ზე და ონლაინ სივრცეში, კოორდინირებულად თანამშორმლობენ ისეთ ძალებთან, როგორებიც არის ანტიდასავლური პროპაგანდის გამტარებლები, მათ აქვთ საერთო დღის წესრიგი, ისინი ერთმანეთს ეხმარებიან, საერთო მმართველობის ქვეშ არიან და ერთად ეწევიან პროპაგანდას მათ შორის, დასავლეთის წინააღმდეგ და ოპოზიციური ძალების წინააღმდეგ.

ის, რომ ასეთი ტიპის გვერდების იდენტიფიცირება და მათი დახურვა ხდება Facebook-ის მიერ, რომ აქტიურად არიან ჩართულნი ამაში სხვადასხვა სამოქალაქო ორგანიზაციები, ეს ძალიან კარგია, რადგან ამ გზითაც მათ შორის ჩვენ უნდა ვებრძოლოთ ყვლანი ერთად ქართული ოცნების ძალიან მავნებლურ და ქვეყნის ინტერესების საწინააღმდეგო პროპაგანდას.“ - განაცხადა კაპანაძემ.