„მთავარი არხის“ გენერალური დირექტორის, ნიკა გვარამიას ადვოკატის, დიტო საძაგლიშვილის განხადებით, სასამართლო პროცესები დაჩქარებულ რეჟიმში წარიმართება. მისი თქმით, 7 დეკემბრის სხდომაზე გრაფიკი გაიწერება.

„მოულოდნელი იყო მაინცდამაინც დღეს დარეკვა და არა ის, რომ ეს საქმე გააქტიურდებოდა. შემატყობინეს, რომ 7 დეკემბერს ჩანიშნულია პროცესი და რაც ნიშანდობლივია მითხრეს, რომ 7 დეკემებერს მოხდება მომავალ სხდომებზე შეთანხმება - გრაფიკი გაიწერება, რაც ნიშნავს იმას, რომ დაჩქარებულ რეჟიმში გაგრძელდება ამ საქმის განხილვა.

დანაშაულის ნიშნები არ არსებობს. ბრალი წაუყენეს იმის გამო, რომ რატომ მეტი შემოსავალი არ მოუტანე რ2-ს სარეკლამო გაყიდვებიდან“, - განაცხადა ადვოკატმა „დღის სტუმარში“.

ადვოატი განმარტავს, რომ სასამართლო განიხილავს 2015 წლის პერიოდს, როდესაც რუსთავი 2-ს ქიბარ ხალვაშის მოთხოვნით ყადაღა დაედო და მენეჯმენტს სესხის აღება აეკრძალა. შესაბამისად ტელეკომპანია მძიმე ფინანსურ მდგომარეობაში აღმოჩნდა და იმისთვის რომ მაუწყებლობას საფრთხე არ დამუქრებოდა, მიიღეს გადაწყვეტილება რეკლამა ფიქსირებულ ფასში გაყიდულიყო.

„2015 წელს, რისი თავიდან არიდებაც მოხერხდა და ეს მოხერხდა უპირველესად ნიკა გვარამიას დამსახურებით, იგივე შედეგი დადგა 2019 წელს, როცა ეს საფრთხე ვეღარ იქნა აცილებული და შედეგად მივიღეთ კომპანია, რომელსაც ძალიან შეუმცირდა სარეკლამო შემოსავლები და რეიტინგი და ეს მოხდა პირდაპირ მენეჯმენტის გადაწყვეტილების გამო, რომელმაც გაათავისუფლა წამყვანი ჟურნალისტები", - ამბობს დიტო საძაგლიშვილი.

ცნობისთვის, გამოძიების უსაფუძვლობაზე სახალხო დამცველის 2019 წლის ანგარიშშიც წერია. ომბუდსმენი აცხადებს, რომ გაოძება საერთოდ არ უნდა დაწყებულიყო რადგან საქმეში სისხლის სამართლის დანაშაულის ნიშნები არ არის.