ხმაური და დაპირისპირება აჭარის მთავრობის სახლთან - აქციის მონაწილეები თორნიკე რიჟვაძესთან შეხვედრას ითხოვენ

პოლიტიკა - 11:22, 30 Nov, 2020

800

ხმაური და დაპირისპირებაა აჭარის მთავრობის სახლთან, სადაც შეკრებილი მოსახლეობა აჭარის მთავრობის თავმჯდომარესთან თორნიკე რიჟვაძესთან შეხვედრას ითხოვს.

აქციას ქობულეთის სოფელ ციხისძირის მოსახლეობაც შეუერთდა - მათი განცხადებით, უკვე თვეებია, სასმელი წყალი არ მიეწოდებათ. სწორედ ამიტომ, ისინი რიჟვაძესთან შეხვედრას მოითხოვენ, მაგრამ, როგორც თავად აცხადებენ, აჭარის მთავრობის თავმჯდომარე ხალხში არასდროს ჩნდება.
აქციის მონაწილეები რიჟვაძის გადადგომას ითხოვენ:
"ის ჩვენი მთავრობის თავმჯდომარე არ არის და არ აქვს უფლება, ამ შენობაში შევიდეს და განკარგულებები გასცეს. ქოცების ოფისში შეიპაროს და იქიდან აკეთოს ლაივები" - განაცხადა აქციის ერთ-ერთმა მონაწილემ.
"რიჟვაძე არის მონაც და მექრთამე-კორუფციონერიც. 1 თვეა, ხალხში არ ჩნდება. საერთოდ დავიწყებული აქვთ ხალხის პრობლემები", - აღნიშნა დეპუტატმა ელგუჯა ბაგრატიონმა.
აქციის პარალელურად, სამოქალაქო აქტივისტები მიმდებარე ტერიტორიაზე სავაჭრო ჯიხურების განთავსებას გეგმავენ, რათა ადამიანებმა ვაჭრობა შეძლონ და მცირედი შემოსავალი მაინც ჰქონდეს დაწესებული შეზღუდვების მიუხედავად.
აჭარის მთავრობის სახლთან ხელახალი საპარლამენტო არჩევნების მოთხოვნით აქცია პერმანენტულად იმართება და ძირითად მოთხოვნად მთავრობის გადადგომა რჩება.