პოლიტიკური გადაწყვეტილება მიღებულია - ყველა დეპუტატი, ვინც გასულია პარლამენტში, ხელს მოაწერს განცხადებას და უარს იტყვის მანდატზე

პოლიტიკა - 18:25, 28 Nov, 2020

2375

პოლიტიკური გადაწყვეტილება მიღებულია - ყველა დეპუტატი, ვინც გასულია პარლამენტში, ხელს მოაწერს განცხადებას და უარს იტყვის მანდატზე.

უკვე მიღწეული შეთანხმებით - პოლიტიკური პარტიები რომლებმაც გადალახეს ბარიერი, უარს ამბობენ პარლამენტში შესვლაზე. ხოლო ისინი, ვინც უკვე გახდნენ დეპუტატები მანდატზე უარს საჯაროდ იტყვიან.

გადაწყვეტილება ცოტა ხნის წინ, "ლეიბორისტული პარტიის" ოფისში ოპოზიციის წევრებმა მიიღეს.

ხელისუფლების ოპონენტებმა დღესვე "ლოქდაუნის" პირობებში სამოქმედო ნაბიჯები შეათანხმეს და პარლამენტის პირველი სხდომის დღის აქტივობა დაგეგმეს.

„იმ დღეს, როდესაც შეიკრიბება მეათე მოწვევის კომუნისტური პარტია უფლებამოსილების ცნობისთვის, ჩვენ არ გავმართავთ ფართომასშტაბიან აქციას, თუმცა ეს საერთოდ არ ნიშნავს იმას რომ ფართომასშტაბიანი აქციები დღის წესრიგიდან იხსნება, აუცილებლად იქნება, როდესაც ჩავთვლით საჭიროდ. ამ დღეს ოპოზიცია შეიკრიბება, ოღონდ არა მხოლოდ ის ოპოზიციური პარტიები, რომლებიც უარს ამბობენ საპარლამენტო მანდატებზე, არამედ ყველა ოპოზიციური პარტია იქნება წარმოდგენილი, რომელიც თვლის, რომ დღეს ერთადერთი გამოსავალი ქვეყანაში არის ახალი არჩევნები. ჩვენ გავაფორმებთ რამდენიმე დოკუმენტს, მათ შორის, ერთ-ერთი იქნება დეკლარაცია, სადაც კიდევ ერთხელ იქნება ჩამოწერილი ის მოთხოვნები, რომელსაც ვაყენებთ 31 ოქტომბრის შემდეგ.

ასევე, პარტიის ხელმძღვანელები თავიანთი ხელმოწერებით მოხსნიან პარტიულ სიებს, ყველა ის დეპუტატი, რომელიც ცესკოს ამ მონაცემებით გასულია პარლამენტში, ყველა ეს დეპუტატი ინდივიდუალურად მოაწერს ხელს განცხადებას და უარს იტყვის სადეპუტატო მანდატზე, ეს იქნება ჩვენი აქცია, როდესაც შეიკრიბება პარლამენტი“,-განაცხადა უდუმაშვილმა.

ოპოზიცია ერთპიროვნული პარლამენტის შეკრების დღეს მეტეხთან შეკრებას და მემორანდუმის გაფორმებას აპირებს.

ბიძინა ივანიშვილის ოპონენტები ერთმანეთთან თანამშრომლობას ოფიციალურად დაადასტურებენ.

მთავარი მოთხოვნები უცვლელია: რიგგარეშე არჩევნები, ცესკოს გდაყენება, პოლიტპატიმრების გათავისუფლება.