საქართველოს პრემიერმინისრტის სპეციალურმა წარმომადგენელმა და რუსეთის ფედერალური სათათბიროს ფედერალური საბჭოს წევრმა შეხვედრა ონლაინ გამართეს - კარასინმ და აბაშიძემ რუსეთ-საქართველოს შორის ავიამიმოსვლის აღდგენაზე ისაუბრეს.

"სატრანსპორტო კავშირებზე საუბრისას, რუსული მხრიდან აღინიშნა, რომ ეპიდემიოლოგიური სიტუაციის გაუმჯობესების კონტექსტში შესაძლებელი იქნება საქართველოსა და რუსეთს შორის პირდაპირი ავიამიმოსვლის აღდგენის საკითხის განხილვა. თუმცა, ამ ეტაპზე რუსეთის მხარეს საბოლოო გადაწყვეტილება ჯერ მიღებული არ აქვს. ქართული მხრიდან აღინიშნა, რომ ამ თემის პოლიტიზება არასწორია", - ნათქვამია ინფორმაციაში, რომელსაც საქართველოს მთავრობა ავრცელებს.

საქართველოს მთავრობის ინფორმაციით , "შეხვედრის დასაწყისში ზურაბ აბაშიძემ ისაუბრა აფხაზეთსა და ცხინვალის რეგიონში არსებულ რთულ ვითარებაზე".

"მიუხედავად პანდემიისა, რუსეთის ფედერაცია აგრძელებს მასშტაბური სამხედრო წვრთნების ჩატარებას, გრძელდება საოკუპაციო ხაზის გასწვრივ ე.წ. ბორდერიზაცია, ადამიანის უფლებების უხეში ხელყოფა, აღნიშნულ რეგიონებთან ფაქტობრივად შეწყვეტილია მიმოსვლა.

განსაკუთრებით ყურადღება გამახვილდა რუსეთსა და ოკუპირებულ აფხაზეთს შორის ერთიანი სოციალური და ეკონომიკური სივრცის ფორმირების შესახებ პროგრამის დამტკიცებაზე, რაც ქართული მხარის შეფასებით წარმოადგენს დე-ფაქტო ანექსიისაკენ გადადგმულ მორიგ უკანონო ნაბიჯს - ვკითხულობთ საქართველოს მთავრობის ოფიციალურ განცხადებაში.

ასევე, გამართულ შეხვედრზე ისაუბრესლუგარის ლაბორატორიაზე. მათი თქმით, ქართული მხარე მზადაა ლუგარის ლაბორატორიაში რუსი ექსპერტები მიიღოს.

რუსეთის მხარის დაინტერესების გათვალისწინებით, ზურაბ აბაშიძემ დაადასტურა, რომ რიჩარდ ლუგარის სახელობის საზოგადოებრივი ჯანდაცვის კვლევითი ცენტრი, რომელიც მნიშვნელოვან როლს ასრულებს საქართველოში პანდემიის წინააღმდეგ ბრძოლაში, შესაბამის ეპიდემიოლოგიურ ვითარებაში მზად იქნება, მიიღოს უცხოელ ექსპერტთა მიერ დაკომპლექტებული ჯგუფი, მათ შორის რუსი ექსპერტები, ლაბორატორიის მუშაობის გასაცნობად. აღინიშნა, რომ ამ კონტექსტში პროპაგანდისტული აჟიოტაჟი სრულიად მიუღებელია - ნათქვამია საქართველოს მთავრობის განცხადებაში.

პოლიტიკურის გარდა, კარასინი-აბაშიძემ ორ ქვეყანას შორის 2020 წლის იანვარ-ოქტომბრის პერიოდში სავაჭრო-ეკონომიკური ურთიერთობების, სატრანსპორტო და ჰუმანიტარული კავშირების დინამიკაც მიმოიხილეს და აღნიშნეს, რომ პანდემიის გამო სავაჭრო ურთიერთობები შემცირდა.