შეზღუდვები ძალას დაკარგავს, თუ პარლამენტი არ შეიკრიბება - გამოიყენებს თუ არა მთავრობა "ლოკდაუნისთვის" ალტერნატივას

პოლიტიკა - 14:05, 27 Nov, 2020

1191

შეზღუდვებმა, რომელიც მთავრობამ დააწესა, შესაძლოა, 1 იანვრიდან ძალა დაკარგოს - ეს იმ შემთხვევაში მოხდება, თუ ახალი პარლამენტი შეკრებას ვერ მოასწრებს.

კანონმდებლობით, შეზღუდვების გახანგრძლივებისთვის ახალი პარლამენტი უნდა შეიკრიბოს და 76-მა დეპუტატმა მხარი უნდა დაუჭიროს, წინააღმდეგ შემთხვევაში, ახლა დაწესებული შეზღუდვები ძალას დაკარგავს.

არსებობს სხვა ალტერნატივაც, რომელიც პარლამენტის შეკრების გარეშე „ლოკდაუნის“ გამოცხადებას ითვალისწინებს - იმისთვის, რომ ეს შეზღუდვები გახანგრძლივდეს, აუცილებელია, მთავრობამ გამოაცხადოს საგანგებო მდგომარეობა და მხოლოდ ამის შემდეგ გახანგრძლივდება დადგენილი შეზღუდვები.

იურისტ ლევან ალაფიშვილის განცხადებით, პირველი „ლოკდაუნის“ გამოცხადების შემდეგ მთავრობამ და პარლამენტმა საზოგადოებრივი ჯანდაცვის შესახებ კანონში შეიტანეს ცვლილებები, რომლის მიხედვითაც მთავრობას პარლამენტის ნებართვის გარეშე ექნება წერტილოვანი შეზღუდვების გამოცხადების უფლება, თუმცა „ლოკდაუნის“ გამოცხადებისთვის აუცილებელია შეიკრიბოს პარლამენტი.

„მთავრობის მიერ მიღებული დადგენილებით, შეზღუდვები მოქმედებს მიმდინარე წლის 31 დეკემბრამდე. იმ შემთხვევაში, თუ შეიკრიბება ახალარჩეული პარლამენტი და ვადას გაახანგრძლივებს, ამ შემთხვევაში მთავრობას ექნება სამართლებრივი საფუძველი, რომ გამოსცეს ახალი დადგენილება და შეზღუდვები დააწესოს ახალი წლის შემდგომი პერიოდისთვის. დღევანდელი მოცემულობით, იმ გადაწყვეტილებებით, რაც მიღებულია ზაფხულში (მხედველობაში მაქვს საზოგადოებრივი ჯანდაცვის კანონში შეტანილი ცვლილება) და მთავრობის გუშინ გამოცემული დადგენილება, ამ სამართლებრივ მოცემულობაში შემოღებული შეზღუდვები მოქმედებს მხოლოდ და მხოლოდ 31 დეკემბრამდე. აი, ზუსტად ამ კანონისა და მთავრობის 322-ე დადგენილების ნორმები საკონსტიტუციო სასამართლოში არა ერთი სარჩელით უკვე არის გასაჩივრებული“ - განაცხადა ლევან ალაფიშვილმა.

შეგახსენებთ, რომ გუშინ მთავრობამ მიიღო გადაწყვეტილება, რომლის მიხედვითაც 28 ნოემბრიდან ქვეყანაში დამატებითი შეზღუდვები ამოქმედდება, მათ შორის გაჩერდება მუნიციპალური ტრანსპორტი, დაიხურება სხვადასხვა დაწესებულებები და საღამოს 21:00 საათიდან დილის 05:00 საათამდე ე.წ. კომენდანტის საათის ფარგლებში ქუჩაში მოძრაობა შეიზღუდება.