27 ნოემბერს, ხვალ , მმართველ პარტიასა და ოპოზიციურ პარტიებს შორის, აშშ–ის და ევროკავშირის ელჩების შუამდგომლობით, მოლაპარაკების მესამე რაუნდი გაიმართება.

შეხვედრა აშშ–ის ელჩის, კელი დეგნანის რეზიდენციაში, დახურულ კარს მიღმა შედგება.

მოლაპარაკების შედეგად, ცნობილი გახდება წავა თუ არა დათმობაზე მთავრობა, რომელსაც ოპოზიცია არჩევნების გაყალბებაში ადანაშაულებს.

ოპოზიციაში აცხადებენ, რომ ქვეყნის პოლიტიკურ კრიზისში შეყვანზე პასუხისმგებლობა "ქართულმა ოცნებამ" უნდა აიღოს. მათი თქმით, გამოსავალი ოპოზიციასა და საზოგადოებას, ბიძინა ივანიშვილმა უნდა შესთავაზოს.

მოლაპარაკებების მესამე რაუნდთან დაკავშირებით, ოპოზიცია დღეს "ლელოს" ოფისში შეიკრიბა.

შეგახსენებთ, რომ ხელისუფლებასა და ოპოზიციას შორის ევროკავშირისა და აშშ-ს ელჩების შუამავლობით, მოლაპარაკებების ორი რაუნდი უკვე გაიმართა.

აქვე, ოპოზიცია პოზიციას არ ცვლის, 31 ოქტომბრის საპარლამენტო არჩევნების შედეგებს არ აღიარებს და პარლამენტში შესვლას არ აპირებს.