გახარია ვირუსის გავრცელებას ოპოზიციის აქციებს აბრალებს

პოლიტიკა - 15:03, 26 Nov, 2020

1168

საქართველოს პრემიერ-მინისტრმა გიორგი გახარიამ სპეციალურ ბრიფინგზე ახალი შეზღუდვები დააანონსა და ქვეყანაში მიმდინარე ეპიდემიური ვითარების გარშემო სხვადასხვა განცხადებები გააკეთა, მათ შორის პოლიტიკური.
გახარიას თქმით, ეპიდემიის სწრაფად გავრცელება სწორედ იმ აქციების ბრალია, რომელიც ოპოზიციამ არჩევნების შემდეგ ჩაატარა:
"აგვისტომდე საქართველო იყო ერთ-ერთი საუკეთესო ქვეყანა ეპიდემიის მართვის თვალსაზრისით. დღეს რაც საქართველოში ხდება, ჩვენი ქვეყნისთვის იმ გამოცდილებით, როგორც ჩვენ ეპიდემიის დასაწყისიდან სექტემბრამდე ვმართეთ, ჩვენი ზომის ქვეყნისთვის არაბუნებრივი გავრცელებაა, ამიტომ გვიწევს ამ ორთვიანი საკმაოდ მკაცრი შეზღუდვების დაწესება. როგორ ფიქრობთ, ეს არაბუნებრივი გავრცელება რამ გამოიწვია? ლოგიკურად რომ მივყვეთ - რა თქმა უნდა, მაღალმა მობილობამ და წესების დაცვის გარეშე დიდი რაოდენობის ადამიანების ერთად თავმოყრამ. პოლიტიკური პროცესის მიზეზიც არის იმიტომ, რომ საარჩევნო კამპანია საკმაოდ მაღალ მობილობას ითვალისწინებს - ეს არის ის, რამაც დღეს მიგვიყვანა საქართველოსთვის არაბუნებრივ ციფრებამდე - ეს მოიტანა აი იმ აქციებმა. ამ აქციებმა გააჩინა რისკი, რომ 3 და 4 ათასიდან სწრაფად ავედით, არ მინდა დავასახელო ციფრები" - განაცხადა გიორგი გახარიამ.