კარტოგრაფების საქმე - რა შხება აქვს გახმაურებულ საქმეზე სალომე ზურაბიშვილს და რატომ ითხოვენ მის დაკითხვას

პოლიტიკა - 12:44, 23 Nov, 2020

1108

ე.წ. კარტოგრაფების საქმე - ადვოკატები საქართველოს პრეზიდენტის სალომე ზურაბიშვილის გამოკითხვას ითხოვენ. შესაბამისი მოთხოვნა ივერი მელაშვილისა და ნატალია ილიჩოვას უფლებადამცველებმა უკვე დააყენეს, თუმცა უცნობია, დათანხმდება თუ არა პრეზიდენტი გამოკითხვას.

უფლებათადამცველები ამბობენ, რომ მას სადელიმიტაციო კომისიის საქმიანობაზე ბევრი ინფორმაცია აქვს, რამდენადაც 2004-2005 წლებში საგარეო საქმეთა მინისტრი იყო.

ივერი მელაშვილის ცოლი, თამარ სულაძე აცხადებს, რომ ზურაბიშვილის მინისტრობის დროს მუშაობდა ივერი მელაშვილი კომისიაში, ამდენად, ზურაბიშვილის გარკვეული ინფორმაცია ექნება. "მისმა გამოკითხვამ, შესაძლოა, საქმეს მეტი ნათელი მოჰფინოს", - ამბობს სულაძე.

ადვოკატი, ედუარდ მარიკაშვილი აღნიშნავს, რომ სალომე ზურაბიშვილი უშუალოდ იყო ჩართული დელიმიტაცია-დემარკაციის პროცესში.

"ის სადავო პერიოდის განმავლობაში საგარეო საქმეთა მინისტრიც იყო და ექვემდებარებოდა კომისია. როგორც მასალებიდან ირკვევა, ბევრი საკითხი სწორედ ზურაბიშვილთან თანხმდებოდა", - განაცხადა ადვოკატმა.

იურისტები თავდაცვის მოქმედი მინისტრის, ირაკლი ღარიბაშვილის, გამოკითხვასაც ელოდებიან.

"საქმე პირდაპირ უკავშირდება ღარიბაშვილს, რადგან ინტერვიუებში პირდაპირ ამბობს, რომ სპეცოპერაცია ჩატარდა მასალების მოსაპოვებლად. საზოგადოებასთვის მნიშვნელოვანია, ყველა კითხვას პასუხი გაეცეს, როდესაც საუბარია ქვეყნის ღალატზე", - თქვა ადვოკატმა, ნესტან ლონდარიძემ.

შეგახსენებთ, რომ აზერბაიჯანთან, საზღვრის დადგენის კომისიის წევრები ივერი მელაშვილი და ნატალია ილიჩოვა 7 ოქტომბერს დააკავეს.