თუ ოპოზიცია ულტიმატუმს ჩახსნის, ამ შემთხვევაში შესაძლებელია კომპრომისის მიღწევა

თუ ოპოზიცია ულტიმატუმს ჩახსნის, ამ შემთხვევაში შესაძლებელია კომპრომისის მიღწევა - მამუკა მდინარაძე

პოლიტიკა - 14:48, 21 Nov, 2020

917

"ქართული ოცნების" ერთ-ერთი ლიდერის მამუკა მდინარაძის განცხადებით, ის იმედოვნებს, რომ ოპოზიცია კომპრომისულ წინადადებაზე იფიქრებს და პარლამენტში შევა, რათა საპარლამენტო ტრიბუნიდან დააფიქსიროს საკუთარი პოზიცია. მისი თქმით, თუ ოპოზიცია ულტიმატუმის ენით საუბარს დაივიწყებს, ამ შემთხვევაში კომპრომისზე წასვლა შესაძლებელი იქნება:

„უნდა გავარჩიოთ ერთმანეთისგან მოლაპარაკების მაგიდასთან დაყენებული წინადადება და ულტიმატუმი, თუკი მათი რიტორიკა ისევ იქნება ისეთი რადიკალური, როგორც აქამდე იყო, ბუნებრივია, კომპრომისზე საუბარი ზედმეტია. საზოგადოება კარგად ხედავს, რომ ფასილიტატორი ელჩები ძალისხმევას არ იშურებენ იმისთვის, რომ მოლაპარაკების მესამე რაუნდი უკვე იყოს შედეგიანი. ჩვენ ვხედავთ მათ შესაბამის მოქმედებებს, ისინი უკვე ცალ-ცალკე ხვდებიან პარტიების წარმომადგენლებს. მგონი, ყველასთვის ცხადია ამ შეხვედრებიდან გამოსული პოლიტიკოსების განცხადებების პათოსი. ვფიქრობ, რომ ისინიც კომპრომისულ წინადადებებზე იფიქრებენ, იმსჯელებენ და პარლამენტში შემოვლენ იმისთვის, რათა თავისი პოზიცია დააფიქსირონ საპარლამენტო ტრიბუნიდან და ბოლოს და ბოლოს პატივს სცემენ თავიანთ ამომრჩეველს, რომლებმაც დაავალეს, რომ მათ მიიღონ საპარლამენტო ცხოვრებაში მონაწილეობა.

როგორც კი წითელ ხაზს გადაკვეთენ, ამ შემთხვევაში, პოზიტიური გაგებით, ბუნებრივია, შემხვედრი წინადადებებიც იქნება ჩვენი მხრიდან, თუ ისინი იფიქრებენ და თავის კონკრეტულ გადაწყვეტილებას ასახავენ ამ ულტიმატუმის ჩახსნაში, ამ შემთხვევაში, უკვე ყველა ვხვდებით, რომ შესაძლებელია კომპრომისის მიღწევა.

„მე ვიმედოვნებ, მწამს და მჯერა, რომ ისინი ამ რადიკალური პოზიციიდან გამოვლენ და მოლაპარაკებათა მაგიდასთან დაიდება ისეთი წინადადები, რომელზეც იქნება შესაძლებელი მსჯელობაც და გადაწყვეტილების მიღებაც,“ - განაცხადა მდინარაძემ.