რელიგიის თავისუფლების იდეა ჩვენთვის უცხო არ არის - საპატრიარქოს საგანგებო განცხადება

საზოგადოება - 18:03, 18 Nov, 2020

1632

საქართველოს საპატრიარქო აშშ-ს სახელმწიფო მდივანთან მაიკ პომპეოსთან შეხვედრის შემდეგ განცხადებას ავრცელებს, სადაც ამერიკული დელეგაციის სტუმრობისა და საუბრის საკითხებია განხილული.

განცხადებაში მკაფიოდაა გამოხატული სხვა რელიგიების მიმართ შემწყნარებლობის მნიშვნელობა, ასევე რელიგიის თავისუფლების საკითხი:

„ითქვა, რომ საქართველო და საქართველოს ეკლესია ყოველთვის იყო შემწყნარებლური ტრადიციული რელიგიების მიმართ და რომ ეს დღესაც ასეა. ამდენად, რელიგიის თავისუფლების იდეა ჩვენთვის უცხო არ არის.

აღინიშნა საქართველოს საპატრიარქოს დელეგაციის აშშ-ში შარშანდელი სტუმრობის და ბ-ნ სემუელ ბრაუნბეკთან შეხვედრის შესახებაც და ყურადღება გამახვილდა უშუალო ურთიერთობების გაღრმავების აუცილებლობაზე. ასევე შეეხნენ ამერიკის კონგრესის მიერ ერთი წლის წინ მიღებულ ორპარტიულ დოკუმენტს, რომელსაც საქართველოს ტერიტორიული მთლიანობის მხარდაჭერისთვის უდიდესი მნიშვნელობა აქვს.

მისმა უწმინდესობამ და უნეტარესობამ მადლობა გადაუხადა სტუმარს აშშ-ს თანადგომისთვის და რთულ პერიოდში ასეთი მნიშვნელოვანი ვიზიტის განხორციელებისთვის. ამასთან, გამოთქვა იმედი, რომ ეს შეხვედრა კიდევ უფრო ეფექტურს გახდის ჩვენს შემდგომ თანამშრომლობას“ - ნათქვამია განცხადებაში.