აშშ-ის სახელმწიფო მდივანის ,მაიკ პომპეოსა და საქართველოში მოღვაწე არასამთავრობო ორგანიზაციების წარმომადგენლებთან შეხვედრაზე ერთხმად ყველა შეთანხმდა, რომ სასამართლო რეფორმისა და კანონის უზენაესობის კუთხით, გასაკეთებელი კიდევ ბევრია. აღნიშნულ ინფორმაციას აშშ-ის საელჩო ავრცელებს.

განცხადების თანახმად, შეერთებული შტატები საქართველოს მხარდაჭერის გასაგრძელებლად მზადყოფნას გამოთქვამს.

"სახელმწიფო მდივანი მაიკ პომპეო სამოქალაქო საზოგადოების წარმომადგენლებს სასამართლო რეფორმასა და საქართველოს განვითარებაში სამოქალაქო საზოგადოების როლზე გულწრფელი და ღია საუბრისთვის შეხვდა. სახელმწიფო მდივანმა აღნიშნა საქართველოს ბოლოდროინდელი ძალისხმევა სასამართლო რეფორმის კუთხით და სამოქალაქო საზოგადოების მნიშვნელოვანი როლი კანონის უზენაესობის ხელშეწყობასა და თანამედროვე სახელმწიფო ინსტიტუტების განვითარებაში. თუმცა, ყველა შეთანხმდა, რომ გასაკეთებელი კიდევ ბევრია და შეერთებული შტატები მზადაა მხარდაჭერის გასაგრძელებლად", - ნათქვამია განცხადებაში.

აქვე, აშშ-ს სახელმწიფო მდივანთან შეხვედრას საქართველოში მოღვაწე არასამთავრობო ორგანიზაციები ესწრებოდნენ, მათ შორის: საქართველოში ამერიკის სავაჭრო პალატა, ეკონომიკური პოლიტიკის კვლევის ცენტრი, საქართველოს დემოკრატიის ინიციატივა, ღია საზოგადოების ფონდი, უფლებები საქართველო და საერთაშორისო გამჭვირვალობა - საქართველო.

ცნობისთვის, პომპეომ ოფოციალური შეხვედრები პრეზიდენტთან, პრემიერთან, საგარეო მინისტთან და არასამთავრობოებთან გამართა. პომპეო ოპოზიციას არ შეხვდა.

შეგახსენებთ, რომ ცოტა ხნის წინ საქართველოში მაიკ პომპეოს ვიზიტი დასრულდა და სახელმწიფო მდივანმა ქვეყანა დატოვა.

ასევე, მაიკ პომპეო თბილისს გუშინ ეწვია და ვიზიტის ფარგლებში ოფიციალური შეხვედრები გამართა.