20 ივნისი, პოლიტპატიმრები, გაყალბებული არჩევნები... - სამოქალაქო აქტივისტების წერილი მაიკ პომპეოს

პოლიტიკა - 17:10, 17 Nov, 2020

892

ახალგაზრდების გზავნილი აშშ-ს სახელმწიფო მდივანს - სამოქალაქო აქტივისტებმა მაიკ პომპეოს წერილი მიწერეს, სადაც 20 ივნისიდან დღემდე საქართველოში მიმდინარე პროცესები დეტალურადაა აღწერილი. მასში ასევე ვრცლად არის საუბარი პოლიტიკური ნიშნით დაპატიმრებულ ადამიანებზე, გაყალბებულ არჩევნებსა და რეპრესიებზე.
წერილი, რომელსაც ხელს 50-მდე აქტივისტი აწერს, უკვე დატოვეს საქართველოს ფოსტაში, მოგვიანებით კი ის ამერიკის საელჩოში პომპეოს სახელზე გაიგზავნება. სამოქალაქო აქტივისტები იტოვებენ იმედს, რომ მას შემდეგ, რაც აშშ-ს სახელმწიფო მდივანი გაეცნობა საქართველოში არსებულ პოლიტიკურ ვითარებას, ხელისუფლების მიმართ საერთაშორისო ზეწოლა გაძლიერდება, რაც საბოლოოდ "ქართულ ოცნებას" დათმობაზე წასვლას აიძულებს:
"წერილს ვაგზავნით მაიკ პომპეოს სახელზე, ამერიკის საელჩოს მისამართზე, ვინაიდან ვთვლით, რომ ის უნდა იყოს ინფორმირებული არა მარტო პოლიტიკური პარტიების, არამედ სამოქალაქო აქტივისტების მიერ, რომლებიც 20 ივნისიდან მოყოლებული ყოველდღიურ რეჟიმში ოპოზიციურ სპექტთან ერთად ვიბრძოდით სამართლიანი არჩევნებისთვის. 20 ივნისის ღამიდან დღემდე ყველა ფაქტი არის აღწერილი და იმ ადამიანების ჩამონათვალია, რომლებიც მიმდინარე პროცესებში აქტიურად იღებდნენ მონაწილეობას და ამის გამო ბევრი დააპატიმრეს, ბევრი დაზარალდა, ბევრს არ გაგვასაჩივრებინეს სასამართლოში, რომ წაგვართვეს ის უფლებები, რომელიც კონსტიტუციით გვქონდა გარანტირებული" - განაცხადა სამოქალაქო აქტივისტმა ნიკა ფარულავამ.