თავდასხმა ან თვითდაგეგმილია, ან რიგითმა ადამიანმა გაბრაზების ნიადაგზე ჩაიდინა - შუკაკიძის ადვოკატი მელიას ბრალდებებს პასუხობს

პოლიტიკა - 13:40, 17 Nov, 2020

1133

ნოდარ და ლევან შუკაკიძეების ადვოკატის ია გაბედავას განცხადებით, ნიკა მელიას შტაბზე თავდასხმა ან თავად გაერთიანებული ოპოზიციის ლიდერის დაგეგმილია, ან ნაციონალებზე გულმოსულმა რიგითმა ადამიანმა მიიტანა იერიში. „კვირის პრესკლუბში“ გამართულ პრესკონფერენციაზე ადვოკატმა განაცხადა, რომ მისი დაცვის ქვეშ მყოფი არ იცნობს კალაძესა და კობიაშვილს, შესაბამისად, მელიას ბრალდება უსაფუძვლოა:

„გუშინ, როგორც საზოგადოებისთვის გახდა ცნობილი, დაწვეს გლდანის მაჟორიტარი დეპუტატობის კანდიდატის, ნიკა მელიას ოფისი. აღნიშნულ ოფისში, როგორც თავად მელიამ აღნიშნა, კამერები არ გახლდათ, თუმცა მათ ყველა დანარჩენ ოფისში განთავსებულია ეს კამერები. ნიკა მელიამ გუშინ დაადანაშაულა კახა კალაძე, ლევან კობიაშვილი და ძმები შუკაკიძეები. მან ისინი უწესო ადამიანებად მოიხსენია და აღნიშნა, რომ ლევან შუკაკიძე მითითებებს აძლევს კალაძეს და კობიაშვილს. ბუნებრივია ამისათვის საჭიროა მტკიცებულებები. მელიამ სახალხოდ, ყოველგვარი მტკიცებულებეის გარეშე განაცხადა, რომ მათ ჩაიდინეს აღნიშნული დანაშაული.

ნიკა მელიამ ასევე გააჟღერა, რომ 31 ოქტომბრის არჩევნებამდე ნოდარ შუკაკიძე საბერძნეთის ციხიდან ჩამოვიდა და საქართველოში იმყოფებოდა. ჩვენ გვაქვს იმის დამადასტურებელი დოკუმენტები, რომ ნოდარ შუკაკიძეს დაუდასტურდა კოვიდინფიცირება და ციხეზე მკურნალობას გადის, ის სამჯერ იყო გადაყვანილი საავადმყოფოში.

9 - წლიანი რეჟიმის დროს ძალიან ბევრი ადამიანი არის მათზე განაწყენებული გამორიცხული არ არის და მრჩება ისეთი შთაბეჭდილება, რომ ეს ფაქტი ან თვითდაგეგმილია, ან რიგითმა ადამიანმა გაბრაზების ნიადაგზე ჩაიდინა აღნიშნული. თუ ვინმეს რაიმე დოკუმენტაცია ან მტკიცებულება აქვს, გამოძიებას უნდა მიაწოდოს. ჩემი დაცვის ქვეშ მყოფი აცხადებს, რომ ამ ფაქტთან არანაირი შემხებლობა არ აქვს, არავისთვის დავალება არ მიუცია და არავისთან კონტაქტი არ აქვს. კალაძეს და კობიაშვილს რომ შევეკითხე, ამ ადამიანს მხოლოდ ტელევიზორიდან იცნობენ. როდესაც ამბობ, რომ ორგანიზებული ჯგუფი ასრულებს, ამას ორგანიზატორიც სჭირდება და შემსრულებელიც“, - განაცხადა ია გაბედავამ.

შეგახსენებთ, რომ ნიკა მელიას შტაბზე თავდასხმა 16 ნოემბერს, გამთენიისას მოხდა. დამნაშავემ ოფისის შუშები ჩაამსხვრია და შიგნით მოლოტოვის კოქტეილი ისროლა, რის შედეგადაც ცეცხლი გაჩნდა და ინვენტარი მთლიანად გაანადგურა.