სირცხვილის კორიდორი არა ამომრჩევლისთვის, არამედ იმ ადამიანებისთვის ეწყობა, რომლებიც არჩევნების გაყალბებაში იყვნენ ჩართული

სირცხვილის კორიდორი არა ამომრჩევლისთვის, არამედ იმ ადამიანებისთვის ეწყობა, რომლებიც არჩევნების გაყალბებაში იყვნენ ჩართული - ლევან ბეჟაშვილი

პოლიტიკა - 16:44, 16 Nov, 2020

953

"ერთიანი ნაციონალური მოძრაობის" წევრმა ლევან ბეჟაშვილმა გადაცემა "დღის კურიერში" სირცხვილის კორიდორის მოწყობაზე ისაუბრა და განმარტა, რომ ის არა ამომრჩევლისთვის, არამედ იმ ადამიანებისთვის ეწყობა, რომლებიც არჩევნების გაყალბებაში იყვნენ ჩართული. მისი განცხადებით, ასეთ პირებს არჩევნებზე მოჰყავდა ამომრჩეველი და მათთვის სასურველ პარტიასა და კანდიდატს ახაზვინებდნენ:

"სირცხვილის კორიდორი უნდა მოვუწყოთ იმ საარჩევნო ადმინისტრაციის მოხელეებს, რომლებმაც გააყალბეს არჩევნები, ჩვენ პატივს ვცემთ ამომრჩეველს. სირცხვილის კორიდორი უნდა მოვუწყოთ იმ საჯარო მოხელეებს, რომლებიც აქტიურად ჩართული იყვნენ ზეწოლებში და ყურით მოჰყავდათ ამომრჩეველი და ძალით ახაზინებდნენ. მოქალაქეების მიმართ არ მოხდება, ჩვენ პატივს ვცემთ ამომრჩევლის ნებას.

თითოეულ სოფელში, თითოეულ უბანში, ყველამ კარგად ვიცით ვინ იყო ჩართული გაყალბების პროცესში, იქნებოდა ეს სოფლის რწმუნებული, გამგეობის თანამშრომელი, ის ადამიანები, რომლებიც განათლების რესურსცენტრიდან ზეწოლას ახდენდნენ მასწავლებლებზე, საარჩევნო ადმინისტრაციის წარმომადგენლები. პროტესტის გამოხატვა და დამისამართება ყველა ადამიანმა უნდა იცოდეს, მათ შორის რიგითმა მოქალაქეებმაც, რომ ეს სირცხვილის კორიდორი უკავშირდება იმ გამყალბებლებს, რომლებმაც 31 ოქტომბერს საქართველოს არჩევნები მოპარეს," - განაცხადა ლევან ბეჟაშვილმა.

შეგახსენებთ, რომ გუშინ ბათუმში გამართულ აქციაზე ნაციონალური მოძრაობის წევრმა ლევან ვარშალომიძემ გააჟღერა ინიციატივა, რომლის მიხედვითაც 21 ნოემბერს, არჩევნების მეორე ტურზე მისულ ამომრჩევლებს სირცხვილის კორიდორი უნდა მოუწყონ.