1 040 სასუნთქი აპარატი და 3 400-მდე ჟანგბადით უზრუნველყოფილი საწოლი - რატომ იღუპებოდნენ პაციენტები, თუ ქვეყანაში კოლაფსი არ არის?

პოლიტიკა - 15:21, 16 Nov, 2020

640

ჯანდაცვის მინისტრის ეკატერინე ტიკარაძის თქმით, ჯანდაცვის სისტემას ქვეყანაში მობილიზებული აქვს 1 040 სასუნთქი აპარატი და 3 400-მდე ჟანგბადით უზრუნველყოფილი საწოლი. ტიკარაძის განცხადებით, ამ მხრივ კოლაფსი არ არის, ხოლო რაც შეეხება შემთხვევებს, როდესაც სასუნთქი აპარატების არარსებობის გამო მძიმე პაციენტების გადარჩენა ვერ მოხერხდა, მინისტრი აღნიშნულ ფაქტებს კლინიკების არაეფექტურ მართვას უკავშირებს:

“დღეს პრემიერთან ერთად კლინიკური სექტორის წარმომადგენლებს შევხვდით, სადაც კლინიკებში მეტად უფრო ეფექტურ მენეჯმენტზე ვისაუბრეთ. ეს გულისხმობს შემდეგს - დღეს-დღეობით ქვეყნაში სასუნთქ აპარატზე დამოკიდებულია დაახლოებით 257 პაციენტი. ჟანგბადდამოკიდებულია 937 პაციენტი. დანარჩენი პაციენტის მდგომარეობა მსუბუქია. რეალურად კლინიკებს შეუძლიათ დანარჩენი პაციენტები კოვიდსასტუმროებში გადაანაწილონ, სადაც ისინი მკურნალობას გააგრძელებენ. აქ ჩვენ საქმე გვაქვს მეტად უფრო არაეფექტურ მართვასთან, რასთან დაკავშირებითაც მათთან კონსულტაციები გავიარეთ, ამ საკითხებზე შევჯერდით. კლინიკები თავიანთ დონეზე მენეჯმენტს გააუჯობესებენ - სასუნთქი აპარატები და ჟანგბადით უზრუნველყოფილი საწოლები იმ პაციენტებისთვის იქნება მობილიზებული, ვისაც ეს ესაჭიროება“, - განაცხადა ეკა ტიკარაძემ.