ევროპული საქართველოს ლიდერი, დავით ბაქრაძე, საერთაშორისო რესპუბლიკური ინსტიტუტის (IRI) ტექნიკური საარჩევნო შეფასების მისიის შუალედური ანგარიშს ეხმაურება 31 ოქტომბრის საპარლამენტო არჩევნებთან დაკავშირებით.

ბაქრაძის თქმით, ამ ანგარიშის დასკვნაა, რომ არჩევნებმა ვერ დააკმაყოფილა აუცილებელი სტანდარტები და როგორც ბაქრაძე აღნიშნავს, ამ ანგარიშის შინაარსიც და დასკვნაც უმძიმესია.

ბაქრაძემ აღნიშნა, რომ რაც მეტი ინფორმაცია გახდება ცნობილი საერთაშორისო პარტნიორებისათვის, მით უფრო კრიტიკული იქნება საერთაშორისო აზრი ივანიშვილის მმართველობის წინააღმდეგ.

„ამ ანგარიშის მთავარი დასკვნაა, რომ საპარლამენტო არჩევნებმა ვერ დააკმაყოფილა აუცილებელი სტანდარტები. ეს არის უმძიმესი შეფასება და თვითონ დასკვნაც, შინაარსიც არის უმძიმესი და ნათლად მიანიშნებს იმ ცვლილებაზე, რომელიც ჩვენი პარტნიორების პოზიციაში ხდება დროთა განმავლობაში, ვინაიდან, საწყისი შეფასებების შემდეგ, რომელიც გაკეთდა მხოლოდ არჩევნების დღის ზედაპირული მონიტორინგით იმ ძალიან შეზღუდული რაოდენობის მისიებით, რაც ჩამოვიდა აქ კოვიდპანდემიის გამო, პოზიციები იცვლება, ჩვენ პარტნიორებს ყოველდღიურად მეტი და მეტი ინფორმაცია აქვთ იმ დარღვევებზე, რომლებიც მოხდა წინასაარჩევნო პერიოდშიც და არჩევნების დღესაც და სწორედ მეტი და ობიექტური ინფორმაციის ასახვა არის ეს ანგარიში და მასში დაფიქსირებული უმძიმესი პრობლემები თავისი უმძიმესი შეფასებით და დასკვნით, რომელიც მოვისმინეთ საერთაშორისო რესპუბლიკური ინსტიტუტისგან.

ეს დარწმუნებული ვარ არ იქნება ბოლო ასეთი ტიპის დასკვნა და რაც უფრო მეტი დრო გავა, რაც უფრო მეტი ინფორმაცია გახდება ცნობილი ჩვენი პარტნიორებისათვის, მით უფრო კრიტიკული იქნება საერთაშორისო აზრი ივანიშვილის ხელისუფლების წინააღმდეგ და მით უფრო კარგად გამოჩნდება რამდენად დააზიანა საქართველოს ინტერესები ხელისუფლებამ არჩევნების გაყალბებით.“ - განაცხადა ბაქრაძემ.