"არ ვაპირებთ ფუნდამენტური ცვლილების გარეშე,კომპრომისზე წასვლას... მოეგეთ გონს, შემდეგ დიალოგზე ხალხისთვის ადეკვატურ პასუხს ველი"- ვაშაძის მიმართვა ხელისუფლებას

პოლიტიკა - 16:31, 14 Nov, 2020

866

„სტრატეგია აღმაშენებლის“ ლიდერი, გიორგი ვაშაძე ამბობს, რომ 2020 წლის საპარლამენტო არჩევნებმა აჩვენა, რომ ქვეყანაში საარჩევნო უფლებები არ არსებობს.

ამასთან ოპოზიციონერმა სიტყვით გამოსვლისას აღნიშნა, რომ ოპოზიციის პოზიცია არის ერთიანი, მყარი და არც ერთი მათგანი არ აპირებს ფუნდამენტური ცვლილების გარეშე რაიმე კომპრომისზე წავიდეს. ~
მისივე განცხადებით, გიორგი ვაშაძის თქმით, ხელახალი არჩევნები აუცილებელ მოთხოვნად რჩება.

„მინდა ჩაგაბაროთ ორკვირიანი ანგარიში, თუ რას მივაღწიეთ: პირველი და მთავარი მიღწევა არის იქ, რომ ჩვენი მშვიდობიანი პროტესტი გრძელდება, ამის მთავარი ამოსავალი წერტილი და ძალა ხართ თქვენ! ოპოზიციის პოზიცია არის ერთიანი, მყარი და არც ერთი ჩვენგანი არ აპირებს ფუნდამენტური ცვლილების გარეშე რაიმე კომპრომისზე წასვლას. ამისთვისაც მადლობა თქვენ, თქვენ გვამხნევებთ ამაში! ვფიქრობ, მნიშვნელოვანი მიღწევაა, რომ ჩვენი ამერიკელი და ევროპელი პარტნიორების შუამავლობით ხელისუფლებას მოუწია კვლავ დიალოგის მაგიდასთან დამჯდარიყო, ამისთვის მადლობა თქვენ, თქვენ ხართ მთავარი მონაწილე. ჩვენ, რა თქმა უნდა, ვაგრძელებთ ბრძოლას.

ამ არჩევნებმა გვაჩვენა, რომ ქვეყნის და დემოკრატიის ფუნდამენტი საარჩევნო უფლებების თვალსაზრისით არ არსებობს ქვეყანაში. თუ საარჩევნო უფლება არ არსებობს ქვეყანაში, თუ მოქალაქეებს არ აქვთ შესაძლებლობა თვითონ გადაწყვიტონ საკუთარი ბედი, ის ქვეყანა განწირულია კრახისთვის.

ჩვენ აუცილებლად ვითხოვთ ახალ არჩევნებს, მაგრამ ამასთან ერთად ვითხოვთ სამართლიან, კანონის შესაბამის თავისუფალ არჩევნებს! სადაც მივიღებთ გადაწყვეტილებას ვის ვანდობთ ჩვენ ბედს“,-განაცხადა ვაშაძემ და ბიძინა ივანიშვილის გუნდს მიმართა "გონს მეგონ":

„ერთი რამ ცხადია, ეს საპროტესტო მუხტი ქვეყანაში არ იკლებს. საზოგადოების უმრავლესობა თქვენი გაყალბებული დათვლითაც კი არ ეთანხმება იმას, რაც ქვეყანაში ხდება. ამ ხალხთან ერთად მინდა მოგმართოთ თქვენ, მოეგეთ გონს! მესამე რაუნდზე როდესაც გვექნება მოლაპარაკება, თქვენთან ველოდები ადეკვატურ პასუხს, პირველ რიგში, ხალხისთვის. მოგვეცით პასუხი იმ მოთხოვნებზე, რასაც ვითხოვთ, იმისთვის, რომ დავასრულეთ ქვეყანაში ეს უბედური დაპირისპირება. ყველას მოგვბეზრდა“,- დასძინა გიორგი ვაშაძემ.