ევროპული საქართველოს წევრი, გიორგი კანდელაკი, მარნეულში, 65-ე უბანზე მომხდარ გაყალბების ფაქტზე საუბრობს.

კანდელაკის თქმით, არჩევნების დღეს, მარნეულის 65-ე უბანზე შევიდა საკრებულოს თანამშრომელი, ელშან გასანოვი, რომელმაც მაგიდაზე დაყარა უბიდან ამოღებული ბიულეტენების დასტა და განაცხადა, რომ მან ეს ბიულეტენები იატაკზე იპოვა.

კანდელაკის თქმით, ამ ფაქტს შეესწრო ეუთოს გრძელვადიანი დამკვირვებელი, კირა კაურინკოსკი, რომელსაც გაუკვირდა აღნიშნული ფაქტი და გააპროტესტა, რა დროსაც ქართული ოცნების წარმომადგენლები მას ფიზიკური ანგარიშსწორებით დაემუქრნენ.

კანდელაკმა აღნიშნა, რომ საბოლოოდ გაყალბებული ბიულეტენები მიათვალეს ხმების საბოლოო რაოდენობას. მისი თქმით, ამ ინციდენტს ჰყავს მოწმეები და ამის შესახებ ინფორმაცია მიწოდებული აქვს შესაბამის საერთაშორისო ორგანიზაციებს.

„მინდა საზოგადეობის ყურამდე მივიტანო მარნეულში, 65-ე უბანზე მომხდარი გაყალბების ფაქტი, როცა ხმების დათვლის დროს უბანზე შემოვიდა მარნეულის საკრებულოს თანამშრომელი, ელშან გასანოვი, რომელმაც უბიდან ამოიღო ბიულეტენების დასტა და დაყარა მაგიდაზე და თქვა, რომ ეს ბიულეტენები იპოვა იატაკზე.

ამ ფაქტს შეესწრო ეუთოს გრძელვადიანი დამკვირვებელი, კირა კაურინკოსკი და რათქმაუნდა, გაუკვირდა, თუ როგორ შეიძლება ესე მოხდეს, რადგან ეს არის ველურობა და კრიმინალი.ამ დროს, ეუთოს გრძელვადიან დამკვირვებელს ფიზიკური ანგარიშსწორებით დაემუქრნენ იქ მყოფი ქართული ოცნების წარმომადგენლები, ადგილი ჰქონდა გაწევ-გამოწევას და ეს დასტა ბიულეტენებისა, სადაც შემოხაზული იყო 41 ნომერი, საბოლოოდ მიათვალეს ხმების საბოლოო რაოდენობას.

ამ ინციდენტს ჰყავს მოწმეები და ეს არის სისხლის სამართლის დანაშაული. ასე, რომ ინფორმაცია ამ ინციდენტის შესახებ მიწოდებული აქვს არამხოლოდ ეუთოს მისიას, არამედ ყველა რელევანტურ პოლიტიკურ ფიგურას და უწყებას ევროპარლამენტში, რათქმაუნდა, შეერთებული შტატების კონგრესის ჰელსინკის კომისიაში, რომელიც პირდაპირ არის დაკავებული ეუთოსთან ურთიერთობებით და ყველა იმ პოლიტიკურ ფიგურას, რომელიც დაინტერესებულია საქართველოში დემოკრატიის განმტკიცებით.“ - განაცხადა კანდელაკმა.