ბიუჯეტის ხათრით მაინც უნდა შედიოდეს პასუხისმგებლიანი პოლიტიკური ძალა პარლამენტში

ბიუჯეტის ხათრით მაინც უნდა შედიოდეს პასუხისმგებლიანი პოლიტიკური ძალა პარლამენტში - ივანე მაჭავარიანი

პოლიტიკა - 11:24, 12 Nov, 2020

547

საქართველოს ფინანსთა მინისტრის ივანე მაჭავარიანის განცხადებით, ბიუჯეტის საპარლამენტო განხილვა არასოდეს ყოფილა ისეთი მნიშვნელოვანი, როგორც ახლა, ამიტომ, მისი თქმით, აუცილებელია ოპოზიცია პარლამენტში შევიდეს, რათა პანდემიისა და კრიზისის პერიოდში ბიუჯეტის სწორი გადანაწილება მოხდეს:

"მე დარწმუნებული ვარ, რომ დიალოგის რესურსი არსებობს და ერთ რამეს გეტყვით - არაფერზე რომ არ იყოს თანხმობა და ვერაფერზე შეჯერდნენ, მგონია, რომ ბიუჯეტის ხათრით მაინც უნდა შედიოდეს პასუხისმგებლიანი პოლიტიკური ძალა პარლამენტში. ბიუჯეტის აქტუალობა დღეს ისეთი მაღალია, პანდემიისა და კრიზისის პერიოდში, როგორც არასდროს.

თუ, ღმერთმა დაიფაროს და ბიუჯეტის მიღება არ ხდება, ავტომატური მოდელი ერთვება და არ არის ეს კარგი. ამ შემთხვევაში, კიდევ უფრო დიდ მნიშვნელობას იძენს ბიუჯეტი, იმიტომ, რომ ამ ბიუჯეტზე და სწორ განაწილებაზე 2021 წლისთვის, ბევრი რამ არის დამოკიდებული, პრაქტიკულად ადამიანების სიცოცხლიდან დაწყებული, ბევრის არსებობასა და ყოფას ეხება და ამ დისკუსიაში მონაწილეობა ყველას ვალია. არასდროს ისე მნიშვნელოვანი არ ყოფილა ბიუჯეტის საპარლამენტო განხილვები და მისი დამტკიცება და ლეგიტიმაცია, როგორც ახლა.

როცა ამბობენ, მათ შორის ოპოზიციიდანაც ისმის, რომ ჩვენ ქვეყანას ხომ არ დავანგრევთ, პირველ რიგში, ქვეყნის დანგრევა-არ დანგრევა გადის იმაზე, რომ უნდა შემოვიდნენ პარლამენტში და ბიუჯეტის განხილვაში მიიღონ მონაწილეობა, თანაც აქტიური", - განაცხადა ივანე მაჭავარიანმა მთავრობის ადმინისტრაციაში გამართულ ბრიფინგზე.