"ნაციონალური მოძრაობის" პარტიის თავმჯდომარე, გრიგოლ ვაშაძე "რუსთავი 2-ის" ეთერში, "ღამის კურიერში" სტუმრობისას აცხადებს, რომ არსებულ ვითარებაში საჭიროა საპროტესტო აქციების გაგრძელება, თუმცა ასევე აუცილებელია პროტესტს დაემატოს პოლიტიკური კომპონენტი, რომელსაც დიალოგი ჰქვია.

ვაშაძის თქმით, მოლაპარაკებები წარმატებული იქნება იმ შემთხვევაში, თუ ის დააკმაყოფილებს იმ აღშფოთებული ადამიანების აზრს, რომლებიც ქუჩაში, გარეთ დგანან და გაყალბებულ არჩევნებს აპროტესტებენ.

"აღარ უნდა მივრბოდეთ ქართველები ჩვენი მთავარი მოკავშირეების დიპლომატიურ წარმომადგენლობასთან და ვეხვეწებოდეთ მათ ხელმძღვანელებს, რამენაირად ერთმანეთთან დაგვალაპარაკონ, იმიტომ რომ ველურები ვართ და ერთმანეთს ვერ ველაპარაკებით. ეს უკვე კატასტროფაა.

გამოსავალი ამ ეტაპზე კი არის შემდეგი - საპროტესტო აქციების გაგრძელება, რომ ხელისუფლებამდე მივიდეს საქართველოს მოქალაქის სრულიად კანონიერი აღშფოთება, მაგრამ ასევე, არსებობს პოლიტიკური კომპონენტი, რომელსაც ჰქვია დიალოგი. ვცადოთ, თუ არ შევედით მოლაპარაკებებში, ვერც იმას გავიგებთ, ეს მოლაპარაკებები დამთავრდება წარმატებით თუ წარუმატებლად. ჩვენ ჩვენი მოთხოვნები გვაქვს,"- აცხადებს გრიგოლ ვაშაძე.