ბიძინა ივანიშვილს მოუწევს ქართველი ხალხისთვის არჩევნების დაბრუნება

ბიძინა ივანიშვილს მოუწევს ქართველი ხალხისთვის არჩევნების დაბრუნება - ბაჩუკი ქარდავა პომპეოს ვიზიტზე

პოლიტიკა - 16:06, 11 Nov, 2020

628

გაერთიანებული ოპოზიციის ერთ-ერთი ლიდერი ბაჩუკი ქარდავა აშშ-ს სახელმწიფო მდივნის მაიკ პომპეოს დაგეგმილ ვიზიტს აფასებს და აცხადებს, რომ მაღალი რანგის წარმომადგენლის ჩამოსვლა არჩევნებიდან ორი კვირის შემდეგ უმიზეზოდ არ ხდება. ქარდავას განმარტებით, დემოკრატიული სახელმწიფოს წარმომადგენელი საქართველოსგანაც დემოკრატიულ პროცესებსა და ამ მიმართულებით ნაბიჯების გადადგმას მოითხოვს, რაც პირველ რიგში ხელახალი არჩევნების ჩატარებასა და ქართველი ხალხის თავისუფალი ნების გამოვლენას ნიშნავს:

"ამერიკის შეერთებული შტატები ჩვენი ერთ-ერთი ყველაზე მთავარი სტრატეგიული პარტნიორი და მეგობარი ქვეყანაა დემოკრატიულ მსოფლიოში და მისი სახელმწიფო მდივნის ვიზიტი ამ ფონზე, როდესაც არჩევნები გაყალბდა და, ფაქტობრივად, ხელისუფლება არ არსებობს და პროცესები მიმდინარეობს ქუჩაში, ალბათ ლოგიკურია და ბუნებრივია, რომ მაღალი რანგის სტუმარი ჩამოდის აშშ-დან. ეს უკავშირდება საქართველოში დემოკრატიული პროცესების დაბრუნების სურვილს. ეს ადამიანები არიან დემოკრატიის ერთგულნი და, ბუნებრივია, ამას მოითხოვენ საქართველოსგანაც. ჩვენ ვიცით, რომ დემოკრატიის განვითარება არის უკეთესი მომავლის ერთადერთი შანსი, არჩევნების გარეშე კი დემოკრატია არ არსებობს, ასე, რომ ბიძინა ივანიშვილს მოუწევს ქართველი ხალხისთვის არჩევნების დაბრუნება - ვფიქრობ, სწორედ ამაზე იქნება საუბარი მაიკ პომპეოსთან გამართულ შეხვედრაზე. ჩვენმა დასავლელმა პარტნიორებმა უკეთ უნდა გაიგონ და დაინახონ, რა ხდება ქვეყანაში" - განაცხადა ბაჩუკი ქარდავამ.

შეგახსენებთ, რომ გუშინ ცნობილი გახდა აშშ-ს სახელმწიფო მდივნის მაიკ პომპეოს საქართველოში ვიზიტის შესახებ, რომელიც 17-18 ნოემბერს იგეგმება.