“ევროპული საქართველოს” და “ნაციონალური მოძრაობის” წარმომადგენლებმა ვაკე-საბურთალოს საოლქო კომისიის შემაჯამებელი სხდომა პროტესტის ნიშნად დატოვეს. “ნაციონალური მოძრაობის” წარმომადგენლის, დავით ნებიერიძემ, განაცხადა, რომ ერთ-ერთი უბნის შესწორებულ ოქმზე გაყალბებული ხელმოწერებია.

“ საბოლოო ჯამში, გარდა იმ უამრავი დარღვევისა, ყველაზე აღმაშფოთებელი და ყველაზე თავხედური, რაც ახლა გაფორმდა არის ის, რომ ყველა კომისიის წევრმა აღიარა, რომ ერთ-ერთი უბნის შესწორების ოქმზე არის გაყალბებული ხელმოწერები, ანუ უბნის კომისიის თავმჯდომარემ თვითონ მოაწერა ხელი შესწორების ოქმში კომისიის წევრების ნაცვლად და დაარტყა ოლქის ბეჭედი და არა საკუთარი უბნის ბეჭედი და დღეს თამაზ ფოლადაშვილი აპირებს, რომ ამ სისხლის სამართლის დანაშაულზე გამოსცეს შემაჯამებელი ოქმი, რაც თავის თავად ფოლადაშვილსაც ხდის სისხლის სამართლის დამნაშავეს”,- განაცხადა ნებიერიძემ.

შეგახსნებთ, რომ საოლქო საარჩევნო კომისიები დღეს ბოლო სხდომებს მართავენ. სხდომებზე კომისიები კენჭისყრის შედეგებს შეაჯამებენ და პროპორციულ და მაჟორიტარულ არჩევნებთან დაკავშირებულ მონაცემებს შემაჯამებელ ოქმებში შეიტანენ. ამით საოლქო საარჩევნო კომისიებს კენჭისყრის შედეგების დასაჯამებლად განკუთვნილი ვადა ეწურებათ.