გლდანის მე-10 საოლქო საარჩევნო კომისიის შენობასთან - ოპოზიციური პარტიების მხარდამჭერები შემაჯამებელი სხდომის მიმდინარეობის პარალელურად არჩევნების შედეგებს აპროტესტებენ და აცხადებენ, რომ შედეგები გაყალბებულია.

აქციის მონაწილეები მოითხოვენ, რომ თამარ ჟვანიამ სასწრაფოდ დატოვოს თანამდებობა.

"110 ოქმიდან 90 ოქმია ჩასწორებული და ბალანსი არ ჯდება. ისინი არიან ჩვენი ხმების ქურდები და გამყალბებლები",- აცხადებენ აქციის მონაწილეები.

აქციის მონაწილეები ასევე სკანდირებენ "წადი".

აქციის მონაწილეებს საოლქო საარჩევნო კომისიასთან მიტანილი აქვთ პლაკატები: "ბიძინას პირადი ნოტარიუსი"; "კმარა მონობა"; "ძალა ხალხშია"; "ჟვანია ციხეში".

ადგილზე მობოლიზებულები არიან სამართალდამცავები.

ცნობისთვის, საოლქო საარჩევნო კომისიები დღეს ბოლო სხდომებს მართავენ. სხდომებზე კომისიები კენჭისყრის შედეგებს შეაჯამებენ და პროპორციულ და მაჟორიტარულ არჩევნებთან დაკავშირებულ მონაცემებს შემაჯამებელ ოქმებში შეიტანენ. ამით საოლქო საარჩევნო კომისიებს კენჭისყრის შედეგების დასაჯამებლად განკუთვნილი ვადა ეწურებათ.