"პარტიაში არავითარი შეუთანხმებელი პოზიციები არ არსებობს" - ასე ეხმაურება ხატია დეკანოიძე ერთიანი ნაციონალური მოძრაობის თავმჯდომარე გრიგოლ ვაშაძის მიერ გაკეთებულ განცხადებას.

"ჩვენ ვართ იმ პოზიციაზე, რომელსაც იზიარებს სრულიად ოპოზიციური სპექტრი. ეს პოზიციები არის შემდეგი - ახალი არჩევნები, ცენტრალური საარჩევნო კომისიის ახალი ადმინისტრაცია და პოლიტპატიმრების გათავისუფლება.

რაც შეეხება ბატონი გრიგოლის განცხადებას, სამწუხარო ის არის, რომ პირველ განცხადებაში იყო გარკვეული მომენტები, რომელიც სხვადასხვა ინტერპრეტაციის საშუალებას იძლეოდა, მათ შორის კითხვის ნიშნები გაჩნდა აპირებს თუ არა „ერთიანი ნაციონალური მოძრაობა“ საპარლამენტო მანდატებით სარგებლობას, შესვლას პარლამენტში და ა.შ. ამიტომ, კარგია, რომ მეორე განცხადებამ სიცხადე შეიტანა და ეს სიცხადე მდგომარეობს იმაში, რომ პროტესტი არ წყდება. ეს არის ძალიან მნიშვნელოვანი, რადგან საქმე ეხება არჩევნების მიტაცებას.

ჩვენ ამ პოზიციაზე ძალიან მყარად ვდგავართ.

პროტესტის პარალელურად, თუ რაიმე სივრცე გაჩნდება ამ წინაპირობებით, რომელიც მე აღვნიშნე, რა თქმა უნდა ეს სივრცე უნდა გამოვიყენოთ.

ჩვენ რა თქმა უნდა გვაქვს მუდმივი კონსულტაციები ჩვენს საერთაშორისო პარტნიორებთან.