ივანიშვილო, ჩვენ შენი არ გვეშინია! - მოძრაობა "სირცხვილია" შეზღუდვებს დაუმორჩილებლობას უცხადებს და დღეს 22:00 საათზე აქციას გამართავს

პოლიტიკა - 15:03, 09 Nov, 2020

674

მოძრაობა "სირცხვილია" სახელმწიფოს მიერ შემოღებული ე.წ. კომენდანტის საათის საპასუხოდ დაუმორჩილებლობას აცხადებს და დღეს, საღამოს 22:00 საათიდან დილის 05:00 საათამდე პარლამენტის შენობის წინ საპროტესტო აქციის გამართვას გეგმავს - ამის შესახებ უკვე დააანონსეს სოციალური ქსელის პირად გვერდზე და სპეციალური განცხადებაც გაავრცელეს:

"საპროტესტო გამოსვლების პასუხად, ხელისუფლებამ 22:00-დან 05:00-მდე გადაადგილება აკრძალა.

ამიტომ დღეს პარლამენტის წინ ერთად გამოვუცხადებთ დაუმორჩილებლობას მთავრობის შეზღუდვებს!

ხელისუფლებამ გუშინ ისევ არაპროპორციული ძალის გამოყენებით, სიცივეში ცივი წყლითა და ცრემლსადენი სითხით დაშალა მშვიდობიანი საპროტესტო აქცია.

და იცით, სადამდე გაუვათ? სანამ საკუთარ სახლებში კომფორტულად მოკალათებულები დაკავებული ადამიანების რაოდენობასა და დასახიჩრების ტიპებს 7 ნოემბერს, 26 მაისსა და სხვა თარიღებს შევადარებთ.

სანამ ეკრანებთან ჩასაფრებულები დავაკვირდებით, ვინმე ისე ხომ არ იქცევა, მისთვის წყლის ჭავლის მიშვერა რომ ღირდეს.

სანამ უსამართლობაზე გაბრაზების ნაცვლად - შიში შეგვიპყრობს.

კიდევ ერთხელ მოგმართავთ, ბიძინა ივანიშვილო! ჩვენ შენი არ გვეშინია.

შენი მხოლოდ შენს დაქვემდებარებულ მონებს ეშინიათ. ნამუსის ფულზე გამყიდველ მონებს. ეშინიათ იმ “მუშკეტერებსაც”, კორონავირუსი რომ უფრო დიდ საფრთხედ ეჩვენებათ და “პოლიტიკაში არ ერევიან”, ამიტომ, წყლის ჭავლით გაწუწულ ადამიანებზე ხმას ვერ იღებენ.

და ალბათ, ეს არის, ამ ქვეყნისა და მისი მოქალაქეების ბედი. ცემისა და დაშინების მიუხედავად, ღირსებას არ ვთმობთ. გიკვირს, არა?

ამ ქვეყანაში ვცხოვრობთ ჩვენ,

ჩვენ, ვინც ყველაფრის მიუხედავად გამოვალთ გარეთ

და ხმას შევუერთებთ მშიერ რაინდებს,

და საპროტესტო წერილებზეც მივაწერთ სახელს…

შენი დღეები დათვლილია! არ გემორჩილებით!" - წერია განცხადებაში.