ოპოზიცია, მომიტინგეების უსაფრთხოების მიზნით, დღევანდელ აქციას ცესკო-სთან ასრულებს, ხვალ კი ისევ რუსთაველის გამზირზე შეიკრიბება

პოლიტიკა - 01:09, 09 Nov, 2020

1042

ცესკო-ს შენობასთან აქციის დარბევის განმეორებითი ფაქტის შემდეგ, ოპოზიციამ გადაწყვიტა, აქციის მონაწილეები გაარიდონ მიმდებარე ტერიტორიას, რათა კიდევ უფრო მეტი მომიტინგე არ დაზარალდეს. ამისთვის ისინი ხვალ რუსთაველის გამზირზე, საღამოს 6 საათზე აპირებენ შეკრებას და კიდევ ერთი აქციის გამართვას:
"ჩვენ ახლა მაქსიმალურად ვეცდებით ვითარების დაწყნარებას, ხალხის გამორიდებას, ისინი რომ დაუნდობელნი და უღმერთოები არიან და ყველაფერს იკადრებენ და იზამენ იმისთვის, რომ დაიცვან ხმების ქურდი თამარ ჟვანია, ეს დავინახეთ. გვინდა, რომ ხალხი არ დაშავდეს, შეხედეთ, როგორ დაერივნენ ხალხს, ურტყამენ, ჩვენ გვინდა ვითარება განვმუხტოთ, მიუხედავად იმისა, რომ თვითონაც დავზიანდით, გვინდა, რომ ყველას მოვუწოდოთ, რომ ეს პერიმეტრი ნელ-ნელა გავათავისუფლოთ" - განაცხადა ალეკო ელისაშვილმა.

"ეს არის კარგი მაგალითი, უზურპატორი როგორ იქცევა - მტყუანი არის, დამნაშავეა, გამყალბებელია, მოძალადეა და კიდე ძალალდობს. ეს პროცესი, მართალი და თავისუფლებისთვის ბრძოლის პროცესი, გვინდა, ჩვენ შვილებს თავისუფალი საქართველო ჰქონდეს, შემოვუნახოთ ასეთი, რომ ჩვენ შვილებს აღარ ესროლონ, ამიტომ ხვალ რუსთაველის გამზირზე 18 საათზე ისევ უნდა შევიკრიბოთ, იმიტომ, რომ ეს ადამიანი აპირებს იქამდე იმოქმედოს, სადამდეც გაუვა" - განაცხადა ოპოზიციის ლიდერმა ნიკა მელიამ.