"Human Rights Watch"-ის ევროპისა და ცენტრალური აზიის ასოცირებული დირექტორი, გიორგი გოგია, აცხდებს, რომ ხელისუფლებამ წყლის ჭავლის გამოყენებით ადამიანის გამოხატვის უფლება და შეკრების თავისუფლება დაარღვია.

მისი თქმით, აქციის მონაწილეების მიმართ სპეციალური საშუალების გამოყენების საჭიროება არ იყო.

"იქიდან, რაც მე ტელევიზიით დავინახე, სპეციალური საშუალების გამოყენების წინ არანაირი გაფრთხილება არ ყოფილა. რა საფრთხეს წარმოადგენდნენ დემონსტრანტები, არ ჩანდა. შესაბამისად, გაფრთხილების გარეშე წყლის ჭავლის გამოყენების საფუძველი მე ვერ დავინახე. მნიშვნელოვანია, რომ ამ დროს ყოფილიყო გაფრთხილება. თუ გაფრთხილება არ იქნებოდა, უნდა ყოფილიყო რაღაც საჭიროება. საჭიროების გარეშე მისი გამოყენება არღვევს გამოხატვისა და შეკრების თავისუფლებას", - წერს გიორგი გოგია.

შეგახსენებთ, რომ ცესკო-სთან წყლის ჭავლი და ცრემლსადენი გაზი გაუშვეს, ისე რომ დემონსტრანტები წინასწარ არ გააფრთხილეს.

შს მინისტრის მოადგილემ კი განაცხადა, რომ პოლიციას აქვს უფლება გამოიყენბოს ჭავლი სპეციალური საშუალება.

მმართველი პარტიის ლიდერი, მამუკა მდინარაძე კი ირწმუნება, რომ აქციის მონაწილეების გაფრთხილება ვერ მოეწრო.

წყლის ჭავლის გამოყენებას გამოეხმაურა სახალხო დამცველი, რომელიც ამბობს, რომ "როდესაც არ მომხდარა ხმამაღალი ფორმით აქციის მონაწილეების გაფრთხილება, ეწინააღმდეგება კანონმდებლობის მოთხოვნას!"