შსს განცხადებას ავრცელებს მიმდინარე პროცესებთან დაკავშირებით. უწყებაში ირწმუნებიან, რომ კანონით მინიჭებული უფლებამოსილების ფარგლებში გამოიყენეს პროპორციული ძალა.

მაშინ, როცა ცესკოსთან მშვიდობიანი აქცია იმართება, შსს პირველ განცხადებას ავრცელებს:

"საქართველოს შინაგან საქმეთა სამინისტრო წარმოადგენს საზოგადოების უსაფრთხოებასა და მართლწესრიგის დაცვაზე პასუხისმგებელ უწყებას. სამინისტრო მთელი დღის განმავლობაში, აქციაზე უზრუნველყოფდა, როგორც საზოგადოებრივი უსაფრთხოებისა და მართლწესრიგის დაცვას, ასევე, თითოეული ადამიანის გამოხატვის თავისუფლებას, რომელიც არ გასცდა კანონით დასაშვებ ფარგლებს. დღის ბოლოს, ცენტრალურ საარჩევნო კომისიასთან მიმდინარე აქციის დროს, აქციის მონაწილეები შეეცადნენ, შეჭრილიყვნენ ცენტრალური საარჩევნო კომისიის შენობაში, რაც კადრებშიც კარგად ჩანს და რისი საშუალებაც მათ პოლიციამ არ მისცა. ვინაიდან აქციის მონაწილეები იყენებდნენ ძალადობრივ მეთოდებს და არ ემორჩილებოდნენ პოლიციის მითითებებს, შინაგან საქმეთა სამინისტრომ მისთვის კანონით მინიჭებული უფლებამოსილების ფარგლებში გამოიყენა პროპორციული ძალა. შინაგან საქმეთა სამინისტრო, როგორც მართლწესრიგის დაცვაზე პასუხისმგებელი უწყება, მოუწოდებს ყველა მოქალაქეს, აქციის ორგანიზატორებსა და მონაწილეებს, დაიცვან მართლწესრიგი და დაემორჩილონ პოლიციის კანონიერ მოთხოვნებს. აქციის მიმდინარეობისას, სამართალდარღვევის ნებისმიერი ფაქტი პოლიციის მიერ, კანონის ფარგლებში, დაუყოვნებლივ იქნება აღკვეთილი." - წერია განცხადებაში.

შეგახსენებთ, რომ რამდენიმე წუთის წინ კი ცესკოთან წყლის ჭავლი გამოიყენა პოლიციამ, ამის შემდგომ კი ცრემლსადენი გაზიც გაუშვეს. ადგილიდან ასევე პოლიცია ცდილობს, გააძევოს ჟურნალისტები.

ცნობისთვის, პოლიციამ წყლის ჭავლიც და ცრემლსადენი გაზიც ყოველგვარი გაფრთხილების გარეშე გაუშვა, მაშინ, როდესაც დემონსტრანტებს ყოველთვის წინასწარ აფრთხილებენ.