მრავალათასიანი აქცია რუსთაველზე - პარტია მოქალაქეების ლიდერი ალეკო ელისაშვილი ამბობს, რომ ქვეყანა საფრთხეშია და პარტიებმა ყველაფერი გვერდზე გადადეს, რათა "თავისუფლება არ დათმონ".

"პარტიული მხარდაჭერის მიუხედავად, პოლიტიკური პოზიციის მიუხედავად, აქ სხვადასხვა დროშა კი ფრიალებს, მაგრამ ერთ საქმეზე ვართ მოსულები. ერთი დარდი გვაქვს და ერთი მიზანი გვაქვს. წესიერ ქვეყანაში გვინდა ვიცხოვროთ და ვაცხოვროთ ჩვენი შვილები. გვინდა, რომ აბუჩად ვერავინ გვიგდებდეს.

ეს დღეები გაისმის: იმასთან ნუ დადგები, ამასთან ნუ დადგები, ამას ნუ იზამ, იმას ხელი არ ჩამოართვა, იმას არ მიესალმო. დიდი საფრთხის წინაშეა საქართველო. ამ საფრთხეში მომავალს გვართმევენ, ამ საფრთხეში აქ მდგომნი უნდა გადავდოთ გვერდზე, ვინ ვის გულზე ეხატება ან არა ეხატება, ვინ ვის გამარჯობას ვეუბნებით ან არ ვეუბნებით, ვინ რამდენი პროცენტი აიღო და ვინ რამდენით ნაკლები. საქართველო არის საფრთხეში და ერთხელ და სამუდამოდ ერთ მუშტად უნდა შევიკრათ და ვაჩვენოთ, მტერს და მოყვარეს, რომ ჩვენ თავისუფლებას არ დავთმობთ", - განაცხადა ალეკო ელისაშვილმა.