"ლელომ" და სხვა ოპოზიციურმა პარტიებმა დღეს რუსთაველზე მსვლელობა გამართეს, რომლითაც გააპროტესტეს არჩევნების გაყალბება და ის შედეგები, რომელიც არარეალურად დაწერა მმართველმა გუნდმა.

საპროტესტო მსვლელობით ისინი კიდევ ერთხელ აპროტესტებენ ცესკოს მიერ მიღებულ გადაწყვეტილებას და 8 ნოემბრის მასშტაბური აქციისთვის ემზადებიან.

"ლელოს" ერთ-ერთი ლიდერის, თაზო დათუნაშვილის თქმით, დღესაც, ისევე, როგორც ბოლო დღეების განმავლობაში, ოპოზიციური პარტიების ლიდერები ერთად ატარებენ მსვლელობებს, რომლის ფარგლებშიც მოსახლეობას მოუწოდებენ აქციაზე მოსვლისა და იმ შედეგების გაუქმებისკენ, რომელიც არ ასახავს ხალხის ნებას.

"ხვალ, 3 საათზე აი აქ, ამ ადგილას, რუსთაველზე ჩატარდება მასშტაბური აქცია. დღეს ჩვენ ყველანი ერთ რამეს მოვითხოვთ - ეს არის ყველაზე მნიშვნელოვანი ხმის თავისუფლების დაცვა. "ქართულმა ოცნებამ", ფაქტობრივად, ჯიბგირების მთავრობამ, ფეხქვეშ გათელა თითოეული ადამიანის არჩევანი, დაამახინჯა რეალობა, თან ისე, რომ ამის მოთმენა უკვე შეუძლებელია. ამიტომ ამ ქვეყნის თავისუფალი მოქალაქეები არ დავთმობთ ჩვენს ხმებს და ვაჩვენებთ ძალიან დიდ ძალას ბიძინა ივანიშვილის და მის მომპალ ხელისუფლებას. ჩვენ ვითხოვთ ახალ არჩევნებს ახალი ადმინისტრაციის პირობებში და ამას აქ ხვალ 3 საათზე მოითხოვს მთელი საქართველო, ყველა, ვისაც გული შესტკივა ქვეყანაზე, ვისაც მობეზრდა გაჩერებულ ქვეყანაში არსებობა. ყველა, ვისაც მობეზრდა გაუბედურებული ეკონომიკა, უნდა დავდგეთ ერთად. ეს არ იკმარეს და გამოაცხადეს კომენდანტის საათი, უსუსური ნაბიჯებით დადიან უკვე, ეს გააკეთეს იმისთვის, რომ ეს მუხტი აქ როგორმე ჩაქრეს, ამას ამით ვერ ჩააქრობენ, ამ აქციაზე ყველაზე მაღალი პასუხისმგებლობა გვექნება და ყველა რეგულაციას დავიცავთ. აქ თავისუფალი ხალხი იქნება, მთავარი მოწოდებით. ჩვენ არ დავთმობთ ჩვენს ძალას,"-განაცხადა დათუნაშვილმა.

"ლელოს" მთაწმინდა-კრწანისის მაჟორიტარი დეპუტატობის კანდიდატის, საბა ბუაძის განმარტებით, მსვლელობები გაგრძელდება მანამ, სანამ არ მიიღებენ შესაბამის შედეგს.

"ვაგრძელებთ მსვლელობებს და კომუნიკაციას ჩვენს ამომრჩეველთან, იმ ხალხთან, რომელიც თავს გრძნობს დამცირებულად, რომლის ღირსებაც შეილახა ამ არჩევნების მოპარვით, ვაჩვენებთ კონკრეტულ ოქმებს და გაყალბებას, მოვუწოდებთ ერთიანობისთვის, ერთიანი სულისკვეთებისთვის, იმისკენ, რომ დროებით გადავდოთ განსხვავებები და მოვახერხოთ, რომ სახელმწიფო გამოვტაცოთ იმ ადამიანებს, რომლებმაც 31 ოქტომბერს ქართველი ხალხის ნების სრულიად საწინააღმდეგოდ იმოქმედეს, მიიტაცეს ეს ქვეყანა და აგრძელებენ საქართველოში დემოკრატიის დამარცხებას,"-აცხადებს ბუაძე.