კორონავირუსმა თითქმის ყველა სფერო მნიშვნელოვნად დააზარალა. განსაკუთრებით დაზარალდნენ ხელოვნების სფეროს წარმომადგენლები, 10 თვეა უკვე მათ თითქმის აღარ ჰქონიათ კონცერტები და არანაირი შემოსავალი აღარ აქვთ.

ისევე როგორც მოსახლეობის უმეტესობას, მათაც აქვთ ბანკის ვალი და მალე პროცენტების გადახდას ფიზიკურად ვეღარ მოახერხებენ.

მომღერალმა თემურ თათარაშვილმა საკუთარი პრობლემის შესახებ სოციალურ ქსელში დაწერა.

თემურ თათარაშვილი: მომილოცეთ დღეს ახალი სტატუსი შევიძინე, ცუდი გადამხდელი გავხდი, იპოთეკა ვერ გადავიხადე. ურააააააააააააააააააააააააააააა

„პრაიმამბები“ ცნობილ მომღერალს დაუკავშირდა და მისი სესხის და პრობლემების დეტალები მისგან გაარკვია.

– სიმღერის გარდა არანაირი შემოსავალი არ არის ჩემს ოჯახში, შემომტანი მხოლოდ მე ვარ. ბინა მაქვს იპოთეკაში, ერთი ბინა “ნაციონალური მოძრაობის“ დროს დავკარგე. მშენებარე კორპუსში მქონდა ბინა, ის გავყიდე და ახალი ვიყიდე, მაგრამ რემონტის თანხა არ მქონდა, რის გამოც ბანკიდან ავიღე ათწლიანი იპოთეკური სესხი და სახლი ჩავდე.

– რა თანხას იხდით ყოველთვიურად?

– ყოველთვიურად საკმაოდ სოლიდურ თანხას 1700 ლარს ვიხდი ბანკში, მაგრამ ახლა ვეღარ გადავიხადე.

– საუბრის დასაწყისში აღნიშნეთ, რომ თვეებია კონცერტები აღარ გქონიათ, ვინ გეხმარებოდათ ამ პერიოდის მანძილზე?

– მეგობრები მეხმარებოდნენ, სოსო პავლიაშვილი, ქეთა თოფურია და ლუბა უსპენსკაია მირიცხავდნენ თანხას მოსკოვიდან. გვარებს და სახელებს ვერ ვიტყვი, თბილისშიც მეხმარებოდნენ ჩემი მეგობრები, ასე ვთქვათ „მათხოვრული“ ცხოვრებით ვცხოვრობდი და მგონი ისე ეგრე უნდა გავაგრძელო ცხოვრება.

– არ ფიქრობთ რუსეთში დაბრუნებაზე, სადაც კარგად გქონდათ აწყობილი კარიერა?

– რუსეთში დაბრუნება გამორიცხულია. რაც არ უნდა მოხდეს არ დავბრუნდები. მე საქართველოს გარეშე ცხოვრება არ შემიძლია. დიდი ოჯახი მაქვს თბილისში და მოსკოვში ცხოვრება არ შემიძლია.

რუსეთშიც გაჭირვებაა, თქვენ რა გგონიათ?! უბრალოდ იქ უფრო მეტი დანაზოგი ჰქონდათ და მეხმარებოდნენ.

პრაიმამბები