ვინ არ შეუქმნის კოალიციას ბიძინა ივანიშვილს - ოპოზიციის დასკვნითი შეხვედრა გადამწყვეტი არჩევნების წინ

პოლიტიკა - 12:21, 30 Oct, 2020

897

მუშაობის დასკვნითი ეტაპი საპარლამენტო არჩევნების წინ - ოპოზიციის ლიდერებმა, რომლებიც ლეიბორისტული პარტიის ოფისში შეიკრიბნენ, ხელი მოაწერეს დოკუმენტს, რომლის მიხედვითაც ისინი უარს აცხადებენ ივანიშვილთან კოალიციიის შექმნაზე.

აღნიშნული ხელშეკრულება არის ერთგვარი გარანტი, რომელიც ოლიგარქთან თანამშრომლობას გამორიცხავს. "ნაციონალური მოძრაობის" საპარლამენტო მდივნის ტინა ბოკუჩავას განცხადებით, არც ერთი ოპოზიციური პარტია არ შეასრულებს ივანიშვილისთვის მაშველი რგოლის ფუნქციას:
"ძალიან მნიშვნელოვანია ის პოლიტიკური და მორალური სიცხადე, რომელსაც გვაძლევს აღნიშნული შეთანხმება და რომლითაც კიდევ ერთხელ ვადასტურებთ ყველა ოპოზიციური პარტია, რომ არც ერთი ჩვენგანი არ შეუქმნის კოალიციას ბიძინა ივანიშვილს და მის "ქართულ ოცნებას" და არ შეასრულებს მისთვის მაშველი რგოლის ფუნქციას. ჩვენ ვთანხმდებით, რომ ეს არის ყოვლად დაუშვებელი და ამაზე არსებობს ყველაზე ფართო ოპოზიციური კონსესუსი, რაც კი დღემდე ყოფილა. ოპოზიცია სრულიად დარწმუნებულია ხვალინდელ გამარჯვებაში და რაც მთავარია, დარწმუნებულია, რომ ხვალ გაიმარჯვებს ქართველი ხალხი და ჩვენი "ერთიანი ნაციონალური მოძრაობა" უკეთესი საქართველოსკენ" - განაცხადა ბოკუჩავამ.
რესპუბლიკური პარტიის თავმჯდომარის ხათუნა სამნიძის განცხადებით, ამ დოკუმენტით ამომრჩეველს ეცოდინება, რომელი პარტია სად იქნება პარლამენტში შესვლის შემდეგ:
"ძალიან მნიშვნელოვანია, რომ არჩევნებამდე ერთი დღით ადრე ამომრჩეველმა მკაფიოდ იცოდეს, რომელი პარტია სად დგას და რას უნდა ელოდეს მისგან, როცა ისინი შესაბამისი წონით აღმოჩნდებიან პარლამენტში. ჩვენ დღეს ვთანხმდებით, რომ არავითარ ვითარებაში და არავითარ შემთხვევაში არ შევუქმნით კოალიციას "ქართულ ოცნებას", რაც კიდევ ერთხელ ნიშნავს იმას, რომ ივანიშვილის პარტია არის მარტო და დგას იმ მხარეს, სადაც მას არც ერთი პარტნიორი არ ჰყავს და, შესაბამისად, ის 31 ოქტომბრის მერე გადავა ოპოზიციაში" - განაცხადა ხათუნა სამნიძემ.
"ევროპული საქართველოს" წევრისა და დეპუტატობის კანდიდატის ლევან თარხნიშვილის განცხადებით, მიუხედავად ოპოზიციური პარტიების ხედვებსა და გეგმებს შორის განსხვავებისა, აუცილებელია საერთო ღირებულებები შეინარჩუნონ:
"აქ შეკრებილი პოლიტიკური პარტიები არ გავუფორმებთ კოალიციას "ქართულ ოცნებას" და ის დარჩება მარტო. მეორე გზავნილი არის ის, რომ მიუხედავად იმ განსხვავებებისა, რომელიც არსებობს ოპოზიციურ პარტიებს შორის, ჩვენი მტავარი მიზანია, რომ ერთად დავსხდეთ და მოვილაპარაკოთ ფუნდამენტალურ საკითხებზე" - აNიშნა თარხნიშვილმა.