იქამდე შეყავით თავი მოსმენების “კანალში”, რომ ვეღარ გააკონტროლეთ ის, რაც არ უნდა წამოგცდენოდათ – ასე უპასუხა ინგა გრიგოლიამ “ქართული ოცების” აღამასრულებელ მდივანს ირაკლი კობახიძეს "რეაქციის" მონოლოგში.

“ბატონო კობახიძევ, ხომ გაფრთხილებდით სულ რაღაც ერთი კვირის წინ, რომ “კანალების” ძახილს შეეშვით, თორემ კანალიზაციაში ამოყოფთ თავს-მეთქი. არ შეეშვით და იქამდე მიხვედით, რომ საკუთარი ხელისუფლებით თუ ძალაუფლებით აღფრთოვანებულმა თქვენივე გუნდის მთავარი საიდუმლო გაეცით, რომ ჩვენ გვისმენთ, გვითვალთვალებთ, ჩვენს ტელეფონებს და სოციალურ ქსელებს ასხედხართ.

იქამდე შეყავით თავი მოსმენების – თქვენთვის საყვარელ სიტყვას გავიმეორებ “კანალში”, რომ ვეღარ გააკონტროლეთ ის, რაც არ უნდა წამოგცდენოდათ. იმედია სასამართლოში შევხვდებით და ამის გარდაუვალობაზე მეტყველებს თქვენივე აღიარებითი ჩვენება, რომ ჩვენ ხელისუფლება გვისმენს და გვითვალთვალებს.

ჩვენ ისედაც ვიცოდით ეს, მაგრამ როცა ამას მმართველი პარტიის აღმასრულებელი მდივანი ბედავს და ღიად ამბობს ამას, ეს უკვე ოფიციალური ჩვენებაა. დავცინებდით ამ საოცრად ბრიყვ ბიჭს, მაგრამ ახლა დაცინვის დრო არ არის, სახეზე გვაქვს სერიოზული დანაშაული და ბრიყვი რომ ბრიყვია, ბრიყვმაც კი უნდა აგოს პასუხი ამ დანაშაულის გამომჟღავნებისას”, – განაცხადა ინგა გრიგოლიამ.

ჟურნალისტმა დიპლომატიურ კორპუსს მიმართავს და მათ რეაგირებს სთხოვს.