მძიმედ არის ქართული ოცნების საქმე, ისინი არიან აგონიაში და ყველაფერს აკეთებენ იმისთვის, რომ როგორღაც შეინარჩუნონ ხელისუფლება

მძიმედ არის ქართული ოცნების საქმე, ისინი არიან აგონიაში და ყველაფერს აკეთებენ იმისთვის, რომ როგორღაც შეინარჩუნონ ხელისუფლება - კაპანაძე

პოლიტიკა - 13:10, 29 Oct, 2020

758

ევროპული საქართველოს საარჩევნო შტაბის ხელმძღვანელი, სერგი კაპანაძე, სამი არასამთავრობო ორგანიზაციის, „საერთაშორისო გამჭვირვალობა - საქართველო“, „სამართლიანი არჩევნებისა და დემოკრატიის საერთაშორისო საზოგადოება -ISFED“ და „ჟურნალისტური ეთიკის ქარტია“ 2020 წლის საპარლამენტო არჩევნების წინასაარჩევნო გარემოს ერთობლივ შეფასებას ეხმაურება, რომლის მიხედვითაც გახშირდა ამომრჩევლებზე, ოპოზიციონერ პოლიტიკოსებზე, დამკვირვებლებზე, აქტივისტებსა და მედია საშუალებების წარმომადგენლებზე განხორციელებული ზეწოლისა და მუქარის ფაქტები.

კაპანაძის თქმით, ხელისუფლება იყენებს სხვადასხვა ხერხს წინასაარჩევნოდ, მათ შორის მოსყიდვებს, ადმინისტრაციული რესურის გამოყენებასა და ოპოზიციის მიმართ დაუსაბუთებელ ბრალდებებს.

კაპანაძემ აღნიშნა, რომ ეს მიუთითებს ხელისუფლების აგონიასა და იმაზე, რომ ისინი აგებენ არჩევნებს.

„ჩვენ გვაქვს რამდენიმე ასეული შემთხვევა, როდესაც ხელისუფლება იყენებს მოსყიდვას, ძალადობას, განსაკუთრებით ამ კვირაში გააქტიურდა მოსყიდვის მიმართულება, პროდუქტებით დაწყებული და ფულით დამთავრებული.

მთელი ამ წინასაარჩევნო პერიოდის განმავლობაში, რეალურად, ქართული ოცნება ასევე იყენებს საჯარო მოხელეებს, ჩვენ გვაქვს კონკრეტული ინფორმაციები. გარდა იმისა, რომ მედიაში გავრცელდა, რომ სუს-ის და ფინანსური პოლიციის მარალჩინოსნები როგორ არიან გადასროლილი უკვე ბოლო ერთი თვეა კონკრეტულ რეგიონებში, იმისთვის, რომ იქ მოახდინონ ხალხის მობილიზება და გამოიყენონ თავიანთი ადმინისტრაციული რესურსი.

წინასაარჩევნო პერიოდში ასევე განსაკუთრებით მნიშვნელოვანია, რომ პირდპირ ხდება ოპოზიციის მიმართ უბრალოდ დაუსაბუთებელი ბრალდებების სროლა, რაღაც რადიკალური სცენარი ამის მაგალითია და ასევე ბრალდება, თითქოს წინა ხელისუფლება ყიდდა საქართველოს ტერიტორიებს და ამის გამო უდანაშაულო ადამიანი ყოვლად სამარცხვინოდ დღეს ზის ციხეში.

ამიტომ, ეს ყველაფერი აჩვენებს ერთადერთ რამეს და ეს არის სწორედ ასახული ამ მოხსენებაშიც, რომ მძიმედ არის ქართული ოცნების საქმე, ისინი არიან აგონიაში და ყველაფერს აკეთებენ იმისთვის, რომ როგორღაც შეინარჩუნონ ხელისუფლება.“ - განაცხადა კაპანაძემ.