თავდაცვის სამინისტრო მედიაში გაცრცელებულ ინფორმაციას უარყოფს და საგანგებო განცხადებას ავრცელებს.

განცხადებაში ნათქვამია, რომ ჯარისკაცების საარჩევნო პროცესში ჩართული არ არიან და ოპოზიციური მედია დეზინფორმაციას ავრცელებს.

,,ვრცელდება ცრუ ბრალდებები, თითქოსდა სამხედრო მოსამსახურეების ნაწილი იმიტომ არ იმყოფება სამხედრო ნაწილებში, რომ ჩართულნი არიან საარჩევნო პროცესში.

საზოგადოებისათვის განვმარტავთ, რომ კოვიდ პანდემიის პირობებში სამხედრო ნაწილებში უსაფრთხოების ინტერესებიდან გამომდინარე, ჯერ კიდევ პანდემიის დასაწყისიდან მიღებულია განსაკუთრებული ზომები. კერძოდ, უმკაცრესი სანიტარულ-ჰიგიენური პირობების პარალელურად, სამხედრო მოსამსახურეების ნაწილი, სადაც ეს შესაძლებელია, გადაყვანილია დისტანციურ მუშაობაზე, ხოლო ნაწილი კი სამხედრო ნაწილებში იმყოფება მონაცვლეობით, რომ ვირუსის გავრცელების პირობებში თავიდან იქნას აცილებული სამხედრო ნაწილის ფუნქციონირების შეფერხება. შესაბამისად, მიღებული ზომები ემსახურება მხოლოდ და მხოლოდ თავდაცვის ძალებში კოვიდთან დაკავშირებული საკითხების იმგვარად მართვას, რომ არ დაზარალდეს ჩვენი ქვეყნის უსაფრთხოების ინტერესები.

რაც შეეხება სამხედროების პოლიტიკურ პროცესებში ჩართვის ბრალდებებს, საზოგადოებისათვის კარგადაა ცნობილი, რომ 2012 წლის შემდეგ თავდაცვის ძალები წარმოადგენს პოლიტიკურად ნეიტრალურ სახელმწიფო ინტიტუციას, სადაც ყველა შეხედულების საქართველოს მოქალაქე ერთიანება ქვეყნის დასაცავად. წინა ხელისუფლებისათვის დამახასიათებელი ნიშანი, ე.წ. დახურული უბნები, რომელიც ქართული ოცნების პირობებში გაუქმდა და სამხედროების ტოტალური კონტროლი ემსახურებოდა ვიწრო პარტიული ინტერესებით თავდაცვის სამინისტროსა და თავდაცვის ძალების გამოყენებას. ხშირი იყო სამხედროებზე ზეწოლისა და არაადამიანური მოპყრობის, დახურული საარჩევნო უბნებით მანიპულაციის ფაქტები, რომლებზეც მიუთითებდა ყველა ავტორიტეტული არასამთავრობო, თუ საერთაშორისო ორგანიზაცია.

აღნიშნული უმძიმესი ვითარება, რომელიც სრულად ანგრევდა თავდაცვის ძალების ინსტიტუციურ საფუძვლებს, რადიკალურად შეცვლილია. დღეს სამხედრო მოსამსახურეებს სრულიად თავისუფლად ჩვეულებრივ საარჩევნო უბნებზე შეუძლიათ გააკეთონ არჩევანი საკუთარი შეხედულების მიხედვით და პარტიული ტელევიზიებიდან ამ რეალობის მოდელირების ნებისმიერი მცდელობა სრულიად წარუმატებლად დასრულდება", - აღნიშნულია განცხადებაში.