ევროპული საქართველოს ბათუმის მაჟორიტარობის კანდიდატის, არმაზ ახვლედიანის თქმით, 31 ოქტომბერს საზოგადოებამ ზურგი უნდა აქციოს წარსულს და გააკეთოს არჩევანი თავისუფლების, მეტი ევროპისა და დასავლეთის სასარგებლოდ საქართველოში.

ახვლედიანმა აღნიშნა, რომ სწორედ კრემლის გავლენების გაღვივებაა წარსული და სწორედ ამას ცდილობს ივანიშვილი, რაც უნდა შეიცვალოს 31 ოქტომბერს.

“31 ოქტომბერს არ უნდა გავაკეთოთ უბრალოდ არჩევანი პარტიებს შორის, დღევანდელ ხელისუფლებასა და ოპოზიციას შორის. ვფიქრობ, რომ არჩევანი გაცილებით უფრო ღრმაა, შეუდარებლად უფრო მნიშვნელოვანია. ეს არის ჩემთვის არჩევანი წარსულს და მომავალს შორის, არჩევანი სიბნელესა და ნათელს შორის. იმიტომ, რომ სიბნელეა, როცა შენ მოგწონს კრემლის გავლენების გაღვივება და გამტკიცება საქართველოში, როცა ამისთვის იღვწი.

ივანიშვილი სწორედ ამას აკეთებს! სინათლეა, როცა გინდა, საქართველოში შემოვიდეს მეტი ევროპა, როცა გინდა, რომ საქართველო უსიტყვოდ, უპირობოდ გახდეს ნატოს წევრი, ევროკავშირის წევრი, გქონდეს ყველაზე მჭიდრო ურთიერთობა შეერთებულ შტატებთან.

ეს ურთიერთობები, სწორედ ეს ხაზია საქართველოსთვის ერთადერთი გზა, რომ ის გახდეს ნორმალური, განვითარებული, დასავლური ტიპის ქვეყანა. ქვეყანა, სადაც თავისუფლებას ექნება მნიშვნელობა, სადაც თავისუფალი ადამიანი ღირსეულად იცხოვრებს. ჩვენ წარსულში გვაბრუნებს ივანიშვილი.

31 ოქტომბერს ამ წარსულს ზურგი უნდა ვაქციოთ და გავაკეთოთ არჩევანი თავისუფლების, ე. ი. მეტი ევროპის, მეტი დასავლეთის სასარგებლოდ საქართველოში.” – განაცხადა ახვლედიანმა.