რეისი ჭორვილა-მოსკოვი - "ჩაბარდეს თავის პატრონს "გაზპრომში“- სააკაშვილი ივანიშვილს სპეცრეისს ჰპირდება

პოლიტიკა - 16:12, 20 Oct, 2020

1116

საქართველოს მესამე პრეზიდენტი მიხეილ სააკაშვილი ამბობს, რომ "ყველაზე დიდი სიურპრიზი, რაც მზადდება ივანიშვილისთვის და საქართველოს მტრებისთვის, არის გიორგი კაპანაძის გამარჯვება".
სააკაშვილმა საჩხერლებს ენმ- ძალა ერთობაშიას მაჟორიტარი კანდიდატის მხარდაჭერისკენ მოუწოდა და მის ღირსებებზე ისაუბრა.

სააკაშვილი საპარლამენტო არჩევნებში ოპოზიციის გამარჯვებაში დარწმუნებულია:

"როგორი ხრიკებიც არ უნდა ჩაატარონ, რა ამბებიც არ უნდა მოგვიმზადონ, როგორი გაყალბებისთვისაც არ უნდა ემზადოს ივანიშვილი, ყველაფერს აქვს თავის დასაწყისი და თავის დასასრული. ამ დიდ ტყუილს, ილუზიასა, დაცინვას, ჩვენი ამაყი ერის, ამ ყველაფერს მოეღება ბოლო. საქართველო იმსახურებს ბევრად უკეთეს მომავალს, საქართველოს საუკეთესო დღეები არის წინ", - თქვა სააკაშვილმა კაპანაძის წარდგენისას.

საქართველოს ყოფილი პრეზიდენტის მიხეილ სააკაშვილის განცხადებით, არჩევნების შემდეგ, ის სპეციალურად გახსნის ჭორვილაში ერთი დღით საერთაშორისო აეროპორტს და რეისით ჭორვილა-მოსკოვით გაამგზავრებს ბიძინა ივანიშვილს.

„ღმერთმა არ ქნას, ესენი არჩევნებზე გაგვიძვრნენ. მათ უკვე გვითხრეს, რომ ჩვენი გზა არის საქართველოს დატოვება და საქართველოდან უცხოეთში გადახვეწა. მინდა ვთქვა, არჩევნების შემდეგ საქართველოს რამდენიმე მილიონი ადამიანი აღარ დატოვებს, როგორც ეს ივანიშვილს სურს. საქართველოს დატოვებს ერთი ადამიანი, სპეციალურად გავხსნით ჭორვილაში ერთდღიან საერთაშორისო აეროპორტს და რეისი ჭორვილა-მოსკოვით ცალი მიმართულებით ჩაბარდეს თავის პატრონს „გაზპრომში“, დაანებოს თავი საქართველოს და მის მოქალაქეებს. ჩემო ძვირფასებო, თქვენ ნახეთ, რომ საქართველოს აბსოლუტური უმრავლესობა მხარს გვიჭერს“,-განაცხადა სააკაშვილმა და იქვე დასძინა, რომ ის თანამდებობისთვის არ იბრძვის.

„ვერანაირი მეჯღანუაშვილი და მაჭრუკანა ვეღარ დაგამცირებთ და ვეღარ ჩაგყრით უბედურ მდგომარეობაში. მინდა გითხრათ, რომ 11 დღე გვაშორებს საქართველოს გადარჩენას. კარგად ვაცნობიერებ ამ პასუხისმგებლობას. თუ ჩვენ საქართველო ახლა ვერ გადავარჩინეთ, მერე, როგორც ქვეყანა გაქრება. თითოეულმა ჩვენგანმა უნდა გააცნობიეროს ეს პასუხისმგებლობა. ბევრი ერი გამქრალა თანამედროვე ეპოქაში, საქართველო ახლა არის გაქრობის საფრთხის წინაშე, მაგრამ ასევე ვიცი, რომ საქართველო გამოღვიძებულია ისე, როგორც არასდროს. არავინ იბრძვის თანამდებობისთვის. საერთოდ არ მაღელვებს არც ერთი კაბინეტი, ევროპის ყველაზე დიდი ქვეყნის პრემიერ-მონისტრობაზე ვთქვი უარი, როცა ეს უკრაინის პრეზიდენტმა შემომთავაზა, მაგრამ ჩემს სამშობლოს- საქართველოს ვერასდროს ვუღალატებ და ჩემს ქართველობაზე, რომლითაც ძალიან ვამაყობ, ვერასდროს ვიტყვი უარს“,-განაცხადა სააკაშვილმა.