პარტია „რეფორმერის“ ბათუმის მაჟორიტარი დეპუტატობის კანდიდატი ჯეირან ოქროპირიძე ბათუმში ქაოტური მშენებლობის შედეგად შექმნილ ინფრასტრუქტურულ პრობლემებს ეხმაურება და ადგილობრივ ხელისუფლებას სამშენებლო რეგულაციების დაცვისკენ მოუწოდებს. როგორც ჯეირან ოქროპირიძე აცხადებს, ბოლო წლებში ქაოტურმა მშენებლობებმა ბათუმს ეკოლოგიური და ურბანული პრობლემა შეუქმნა, რაც ადგილობრივ მოსახლეობას ძალიან აწუხებს.

ჯეირან ოქროპირიძე: ბოლო რამდენიმე წელია ბათუმი ქაოტური მშენებლობების ტალღამ მოიცვა, საცხოვრებელი კორპუსები უკვე ტროტუარებზეც კი შენდება, თითქმის აღარ დარჩა სივრცე სკვერებისთვის, სადაც მოხუცები, ბავშვები დაისვენებენ. განსაკუთრებით დაზარალდნენ ის მოქალაქეები, რომლებიც არ ცხოვრობენ სანაპირო ზოლის მიმდებარედ“

ქაოტური მშენებლობები ურბანულ პრობლემებთან ერთად ეკოლოგიური საფრთხის წინაშე აყენებს ადგილობრივ მოსახლეობას. თუ გავითვალიწინებთ, რომ ბათუმში გაუმართავია საკანალიზაციო სისტემები, რომელიც მცირე ნალექის დროსაც კი მწყობრიდან გამოდის, ძნელი წარმოსადგენი არაა რა პრობლემების წინაშე დგას ჩვენი მოსახლეობა.

როგორც რეფორმერის მაჟორიტარი დეპუტატობის კანდიდატი ჯეირან ოქროპირიძე აცხადებს, ქაოტურ განაშენიანებას მოჰყვა სივრცითი მოწყობის პრობლემებიც, რაც ქალაქში სატრანსპორტო კოლაფსსაც იწვევს: “ იმის მიუხედავად, რომ ჩვენთვის ძალიან მნიშვნელოვანია ქალაქის განვითარება და კერძო სექტორის მიერ განხორციელებული ის პროექტები, რასაც ახალი სამუშაო ადგილების შექმნა მოჰყვა, განაშენიანება უნდა აკმაყოფილებდეს კანონის მოთხოვნებს და რეგულაციებს, არ უნდა ანადგურებდეს გარემოს. როგორც ადგილობრივები ამბობენ, აჭარაში ნებართვების მოპოვება ხდება კანონის გვერდის ავლით, კორუფციული გარიგებების შედეგად. არ არსებობს ქალაქის განაშენიანების ერთიანი ხედვა, რომლის მიხედვითაც უნდა განვითარდეს ქალაქში სივრცითი მოწყობა.

„რეფორმერის“ ხედვით, მნიშვნელოვანია, ბათუმის განაშენიანება დაექვემდებაროს ერთიან კონცეფციას და გამკაცრდეს სამშენებლო რეგულაციების დაცვა. ბათუმს უნდა შეუნარჩუნდეს ის ხიბლი, რაც აქვს და გათვალისწინებული უნდა იყოს რეკრეაციული ზონები და სპორტული, დასასვენებელი სივრცეები, რომ ადამიანებმა შეძლონ ცხოვრება ჯანსაღ და ეკოლოგიურად სუფთა გარემოში - აცხადებს პარტია „რეფორმერის“ ბათუმის მაჟორიტარი დეპუტატობის კანდიდატი ჯეირან ოქროპირიძე.