"სტრატეგია აღმაშენებლის ერთ-ერთი ლიდერი სერგო ჩიხლაძე მინისტრ ტიკარაძეს საჯარო დისკუსიაში"

პოლიტიკა - 10:45, 17 Oct, 2020

1274

"სტრატეგია აღმაშენებლის" ერთ-ერთი ლიდერი ჯანდაცვის მინისტრს კითხვებით მიმართავს. როგორც სერგგო ჩუხლაძე აღნიშნავს ქვეყანაში ეპიდვითარება ყოველდღე უარესდება. ჩიხლაძე კორონავირუსის მართვასთან დაკავშირებით ეკატერინე ტიკარაძეს დისკუსიაში იწვევს
"ყოველდღე უარესდება ეპიდემიოლოგიური სიტუაცია, ყოველდღე უარესდება ეპიდსიტუაციის მართვა ქვეყანაში. მორღვეულია მთლიანად ტესტირება-დიაგნოსტიკის კომპონენტი, გაურკვეველი და ურთიერთგამომრიცხავი ინფორმაცია ვრცელდება საწოლფონდთან დაკავშირებით, სავალალო მდგომარეობაა ე.წ. კოვიდ სასტუმროებში, 112 და სასწრაფო დახმარება დროულად და რიგ შემთხვევებში საერთოდ ვერ რეაგირებს მოქალაქეების ჯანდაცვის საჭიროებებზე. არ გვაქვს ინფორმაცია რა მდგომარეობაა სამედიცინო სახარჯი მასალების ან წამლების კუთხით ქვეყანაში, სამედიცინო პერსონალის გადამზადება და ეფექტურად ადამიანური რესურსების მობილიზება ჯანდაცვის სფეროში კვლავ არ ხდება. სრულიად გაუმჭვირვალეა კოვიდთან მიმართებაში მობილიზებული და უცხოური დახმარების სახით მიღებული მილიარდობით ლარის ხარჯვის პროცესი. ამასთან ერთად, დღითიდღე უარესდება ადამიანების და ქვეყნის ეკონომიკური მდგომარეობა. უკვე ყოველ დღეს აქვს გადამწყვეტი მნიშვნელობა, რადგან ეფექტური გეგმისა და სტრატეგიის გარეშე, ყოველი 1 დღის დაყოვნება ნიშნავს დამატებით გარდაცვლილ ადამიანებს, დამატებით ათასობით დაინფიცირებულ ადამიანს, დამატებით ათასობით სიღარიბისთვის და შიმშილისთვის გაწირულ ადამიანს. დაუყოვნებლივ ვითხოვ საჯარო დისკუსიას ჯანდაცვის მინისტრ ქალბატონ ტიკარაძესთან და ვუსვამ კონკრეტულ კითხვებს: 1. რა გააკეთეთ განვლილ 6 თვეში ჯანდაცვის სისტემის ეპიდემიის ტალღისთვის მოსამზადებლად და სად დაიხარჯა კოვიდზე მობილიზებული თანხები?2. რატომ გვეღუპება ადამიანები ე.წ. კოვიდ სასტუმროებში და რატომ რჩება ასეთ სივრცეებში პაციენტები ყოველგვარი სამედიცინო ზედამხედველობის გარეშე?3. რატომ ვერ ააწყვეთ ტესტირება-დიაგნოსტიკის კომპონენტი ქვეყანაში გასული 6 თვის მანძილზე?4. რატომ არ მუშაობს 112 და სასწრაფო სამედიცინო დახმარების კომპონენტი ქვეყანაში და რატომ უწევთ მოქალაქეებს საათობით ლოდინი საჭირო სამედიცინო დახმარების მისაღებად?5. რატომ არ დაიწყეთ ჯერ კიდევ გაზაფხულზე ოჯახის ექიმების მასიური ტრენინგი და მომზადება პაციენტების ბინაზე სამართავად?6. რატომ არ დაიწყეთ მოლაპარაკება კერძო სექტორთან საჭირო საწოლფონდის და სამედიცინო პერსონალის მობილიზაციისთვის და მოსამზადებლად? და რატომ იწყებთ ამაზე ფიქრს მხოლოდ ახლა ოქტომბერში, როდესაც სიტუაცია კონტროლიდან გაგექცათ.7. რა გეგემა გაქვთ ეპიდემიის სამართავად? წარმოადგინეთ კონკრეტული, დროში გაწერილი და განსაზღვრულ ინდიკატორებზე დაფუძნებული გეგმა, ყველა მიმართულებაზე პასუხისმგებელი პირებით" - სერგო ჩიხლაძე