"ეს არის რუსეთის სპეცოპერაცია საქართველოს წინააღმდეგ, მისი ერთ–ერთი შემსრულებელი, თავდაცვის მინისტრი იქნება ევაკუირებული საქართველოდან"

"ეს არის რუსეთის სპეცოპერაცია საქართველოს წინააღმდეგ, მისი ერთ–ერთი შემსრულებელი, თავდაცვის მინისტრი იქნება ევაკუირებული საქართველოდან" – შაშკინი ე.წ. გარეჯის საქმეზე

პოლიტიკა - 15:55, 16 Oct, 2020

2988

ე.წ. დავით გარეჯის საქმე – "ერთიანი ნაციონალური მოძრაობის" პოლიტიკური საბჭოს წევრი დიმიტრი შაშკინი საქართველოს თავდაცვის მინისტრის ირაკლი ღარიბაშივილის განცხადებას ეხმაურება.
ღარიბაშვილი საქართველო–აზერბაიჯანის საზღვართან დაკავშირებული ე.წ. რუკების რუსეთის ფედერაციიდან შემოტანას სპეცოპერაციას, შემსრულებელს კი გმირს უწოდებს.
საქართველოს თავდაცვის ყოფილი მინისტრი კი ამბობს, რომ ოკუპანტ ქვეყანაში თუ სპეცოპერაცია ჩატარდა, მისი ყველა შემსრულებელი საქართველოში ევაკუირებული უნდა იყოს, რაც ასე არ მომხდარა:
"გუშინ თავდაცვის მინისტრმა განაცხადა, რომ რუკის საქართველოში ჩამოტანა იყო სპეცოპერაცია, მისი შემსრულებელი კი გმირი. ეს საკითხი რომ ჩავშალოთ - თუ ჩვენი სპეცსამსახურების სპეცოპერაცია ჩატარდა ქვეყანაში, რომელთანაც დიპლომატიური კავშირი არ გვაქვს და რომელსაც ჩვენი ტერიტორიის 20% აქვს ოკუპირებული, მაშინ მასში მონაწილე ყველა პირი ან საქართველოში უნდა იყოს ევაკუირებული, ან უკვე რუსეთს უნდა ჰყავდეს დაკავებული. თუ სპეცოპერაციის მთავარი მონაწილე არამცთუ არაა ევაკუირებული, არამედ დღესაც რუსეთის სპეცსამსახურების კომპანია "სისტემის" დირექტორია, მაშინ, თავდაცვის მინისტრი სწორი ყოფილა, უბრალოდ, ეს არის რუსეთის სპეცოპერაცია საქართველოს წინააღმდეგ. თუ ეს სპეცოპერაცია "არჩევნები 2020" ჩაუვარდათ, მისი ერთ-ერთი შემსრულებელი, საქართველოს თავდაცვის მინისტრი აუცილებლად ეყოლებათ ევაკუირებული, ოღონდ საქართველოდან", - ამბობს დიმიტრი შაშკინი.

შეგახსენებთ, რომ ე.წ. დავით გარეჯის საქმეზე საქართველოს ტერიტორიების საწინააღმდეგოდ მიმართულ ქმედებებში დაადანაშაულეს ივერი მელაშვილი და ნატალია ილიჩოვა, ისინი საქართველო-აზერბაიჯანის დემარკაციის კომისიის ექსპერტთა საბჭოს წევრები გახლდნენ. ამ დროისათვის მათ აღკვეთის ღონისძების სახით წინასწარი პატიმრობა აქვთ შეფარდებული. მათი დაკავება რუსეთის ფედერაციიდან შემოტანილი რუკების საფუძველზე მოხდა, რომელთა წარმოშობაც გაურკვეველია და საქმეში მთავარ მტკიცებულებად არის მიჩნეული.