მაია კუკავა:: მოსახლეობასთან შეხვედრებს კარდაკარის პრინციპით და სამუშაო შეხვედრების ფორმატში ვაგრძელებ. ვაკის რაიონში გაზრდილმა მშენებლობებმა გამოიწვია მოსახლეობის ზრდა, შესაბამისად, არსებული საჯარო სკოლამდელი აღზრდის დაწესებულებები და სკოლები ვეღარ აკმაყოფილებს მოთხოვნას და ადგილობრივები იძულებულები არიან ბავშვები სხვა რაიონში მდებარე სკოლებსა და საბავშვო ბაღებში ატარონ. ეს ბევრი ოჯახისთვის პრობლემაა და დამატებით ხარჯებთან არის დაკავშირებული. ამას გარდა, იწვევს სატრანსპორტო ქსელთან დაკავშირებულ პრობლემებს, სატრანსპორტო კოლაფსს, რაც ვაკის რაიონისთვის ბოლო პერიოდის ყველაზე დიდი გამოწვევა გახდა. ვაკის რაიონში საჯარო სკოლამდელი აღზრდის დაწესებულებების და სკოლების გახსნა ამ პრობლემას ვერ მოაგვარებს. პრობლემას კომპლექსური მიდგომა სჭირდება.

როგორც მაია კუკავა აცხადებს, პარტია „რეფორმერის“ ხედვა ყველა სფეროში განათლებას ეფუძნება. მიმდინარე ეტაპზე სახელმწიფოში არსებული სტრატეგიით აქცენტი გაკეთებულია მოკლევადიან, ერთჯერადი პრობლემების გადაჭრაზე, რაც ვერ უზრუნველყოფს განათლების სისტემის ძირეულ ცვლილებას, რომ მან უპასუხოს თანამედროვე, სწრაფად ცვალებადი მსოფლიოს და საქართველოს წინაშე მდგარ გამოწვევებს.

მაია კუკავა: განათლების კუთხით „რეფორმერის" მიზანია ფუნდამენტური ცვლილებების ინიცირება ისეთი საგანმანათლებლო სისტემის შესაქმნელად, რომელიც გრძელვადიან პერიოდში უპასუხებს 21-ე საუკუნის გამოწვევებს, ჩამოაყალიბებს საზოგადოებაში მოზარდი თაობის ინტეგრირების მოდელს, რომელიც ორიენტირებულია სწავლისა და სწავლების მაღალი შედეგების მიღწევაზე, პრაქტიკაში ცოდნის გამოყენებასა და სწორი პროფესიული არჩევანით დასაქმებაზე. „რეფორმერის“ მიზანია, საქართველო ჩამოყალიბდეს რეგიონის განათლების ცენტრად ერთგვარი ჰაბის სახით, რომელიც მოემსახურება სამხრეთ კავკასიის, ახლო აღმოსავლეთის, აზიისა და აღმოსავლეთ ევროპის, აგრეთვე სხვა ქვეყნების საგანმანათლებლო მოთხოვნებს

„რეფორმერის“ ერთ-ერთი უპირველესი ამოცანაა დღევანდელი ფორმით არსებული საჯარო სკოლების კონცეფციის ცვლილების ინიცირება და ახალი მოდელის დანერგვა. საჯარო სკოლები უნდა გადაკეთდეს ეგრეთ წოდებულ კამპუსის სტილის საჯარო სკოლად, რომელიც განთავსებული იქნება ქალაქის გარეუბნებში ან ქალაქგარეთ, რეგიონების შემთხვევაში კი გეოგრაფიულ და ადმინისტრაციულ ცენტრებში, ეკოლოგიურად სუფთა გარემოში, კამპუსის მთელი ტერიტორიაზე დაცული იქნება უსაფრთხოება.

მოსწავლეები უზრუნველყოფილი იქნებიან უფასო ტრანსპორტით, ყველა საჭირო ინფრასტრუქტურით, რომელიც ერთ სივრცეში გააერთიანებს სასწავლო დაწესებულებას, სპორტული აქტივობებისთვის საჭირო ინფრასტრუქტურას, დასვენებისა და გართობის სივრცეებს. ეს მოსწავლეებს შესაძლებლობას მისცემს მიიღონ მაღალი ხარისხის აკადემიური, მეცნიერული, სპორტული, სახელოვნებო, პროფესიული განათლება და განვითარდნენ. ამ ტიპის სასკოლო დაწესებულებაში წარმართული სასწავლო პროცესი არის წარმატების პერსპექტივა ყველა მოსწავლისთვის. კამპუსის ტიპის სკოლებში მოსწავლეები იღებენ თანამედროვე, გამოყენებით განათლებას, მაღალი კვალიფიკაციის მასწავლებლებისა და მწვრთნელების მენტორობით - აცხადებს პარტია “რეფორმერის“ ვაკის რაიონის მაჟორიტარი დეპუტატობის კანდიდატი მაია კუკავა.