ე.წ. ციანიდის საქმეზე მსჯავრდებულ დეკანოზ გიორგი მამალაძეს ჯანმრთელობის მდგომარეობის გაუარესების გამო პენიტენციური დაწესებულებიდან ერთ-ერთ კლინიკაში გადაიყვანენ.

დეკანოზის ძმა თორნიკე მამალაძე ამბობს, რომ მისი ძმის ჯანმრთელობის მდგომარეობა დღითიდღე უარესდება.

„ჩემი ძმა წელიწადი და 8 თვეა პარალიზებულია. მისი ჯანმრთელობის მდგომარეობა დღითიდღე უარესდება, პარალიზებული ხელ-ფეხი ჯანმრთელ ხელ-ფეხთან შედარებით საკმაოდ დაწვრილებულია. პარალიზებული აქვს მარჯვენა ხელ-ფეხი, მარჯვენა ფეხის კიდური 9-10 სანტიმეტრითაა დაწვრილებული ჯანმრთელ ფეხთან შედარებით, მარჯვენა ხელი კი, 4-5 სანტიმეტრითაა დაწვრილებული. ელემენტარული ყურადღებაც კი ვერ ექცევა ჩემ ძმას იქიდან გამომდინარე, რომ ამ დაავადების სპეციალისტები პენიტენციურ დაწესებულებას არ ჰყავს. ამიტომ, მივიღეთ გადაწყვეტილება, კიდევ ერთხელ მომხდარიყო დეკანოზის გამოკვლევა"- ამბობს მამალაძე.