"მილიონობით ლარის გათეთრება და ტრანსნაციონალური დანაშაული"- ლილოში ჩატარებული სპეცოპერაციის დეტალები

პოლიტიკა - 15:43, 13 Oct, 2020

1128

ჯგუფურად განხორციელებული უკანონო შემოსავლის ლეგალიზაციის ფაქტი და ფულის გათეთრება-საქართველოს გენერალური პროკურატურა ავრცელებს განცხადებას , სადაც ტრანსნაციონალურ დანაშაულზეა საუბარი.

საგამოძიებო უწყების განცხადებით, მოსამართლის განჩინებით, დღეს რამდენიმე ადგილას ჩხრეკა ჩატარდა, ამოღებულია დოკუმენტაცია და დიდი ოდენობით თანხა:

„საქართველოს გენერალური პროკურატურის საგამოძიებო ნაწილში მიმდინარეობს გამოძიება სისხლის სამართლის საქმეზე, ჯგუფურად განხორციელებული უკანონო შემოსავლის ლეგალიზაციის ფაქტზე, რასაც თან ახლდა განსაკუთრებით დიდი ოდენობის შემოსავლის მიღება, საქართველოს სისხლის სამართლის კოდექსის 194-ე მუხლის მეორე ნაწილის „ა“ და ამავე მუხლის მესამე ნაწილის ,,გ“ ქვეპუნქტებით გათვალისწინებული დანაშაულის ნიშნებით.საქმე ეხება ტრანსნაციონალური ხასიათის, ათეულობით მილიონი სხვადასხვა ვალუტის თანხების შესაძლო გათეთრებას.

აღნიშნულ სისხლის სამართლის საქმეზე, გამოძიებისთვის მნიშვნელოვანი დოკუმენტაციის და ელექტრონული ინფორმაციის მატარებელი მოწყობილობების, ასევე დანაშაულებრივი გზით მოპოვებული თანხების მოძიება-ამოღების მიზნით, 2020 წლის 13 ოქტომბერს, თბილისის საქალაქო სასამართლოს მოსამართლის განჩინების საფუძველზე, თბილისში მდებარე რამოდენიმე ობიექტში ჩატარდა საგამოძიებო მოქმედება - ჩხრეკა, რა დროსაც გამოძიებისთვის მნიშვნელოვან დოკუმენტაციასთან ერთად ამოღებული იქნა განსაკუთრებით დიდი ოდენობით თანხები.

საგამოძიებო მოქმედებების შედეგად ამოღებული ფასეულობების უსაფრთხო ტრანსპორტირების უზრუნველყოფის მიზნით, გამოყენებული იქნა სპეციალური დანიშნულების რაზმის თანამშრომლები." ნათქვამია პროკურატურის განცხადებაში.

სავარაუდოდ, ამავე გამოძიების ფარგლებში ჩაატარეს სპეცოპერაცია დღეს, კახეთის გზატკეცილზე, კომპანია "ბროლის" ოფისში.