"ოცნებისთვის" ია კერზაიას გარდაცვალება საკმარისი არ აღმოჩნდა! "ხელისუფლებამ კვლავ მასწავლებლებისა და სკოლის დირექტორების დაშინების, მუქარისა და სამსახურიდან კვალიფიციური კადრის გათავისუფლების გზა აირჩია"- ნინო კვიტაიშვილი

პოლიტიკა - 13:33, 13 Oct, 2020

989

ერთიანი ნაციონალური მოძრაობის პოლიტიკური საბჭოს წევრ ნინო კვიტაიშვილის შეფასებით, ყველა პირი, რომელსაც აქვს ქართული ოცნებისადმი ობიექტურად ნეგატიური დამოკიდებულება, ხელისუფლების მხრიდან წნეხსა და ზეწოლას განიცდის. მათ შორის პედაგოგებიც.

"ხელისუფლებამ ძალაუფლების შენარჩუნებისთვის კვლავ განათლების სისტემაში დასაქმებული ადამიანების, მასწავლებლებისა და სკოლის დირექტორების დაშინების, მუქარისა და სამსახურიდან კვალიფიციური კადრის გათავისუფლების გზა აირჩია. ყველა პირი, რომელსაც აქვს ქართული ოცნებისადმი ობიექტურად ნეგატიური დამოკიდებულება, არ არის ჩართული მათ პარტიულ აქტივობებში და აქვს განსხვავებული პოლიტიკური არჩევანი დღეს განიცდის წნეხსა და ზეწოლას.

ია კერზაიას გარდაცვალება მათთვის არ აღმოჩნდა საკმარისი და გუშინ კიდევ ერთი ადამიანის ჯანმრთელობა დადგა საფრთხის ქვეშ, რომლის ოჯახის წევრიც გაერთიანებული ოპოზიციის შტაბის წევრია. აშკარაა, რომ ის პოლიტიკური ნიშნით გაათავისუფლეს და ამ უსამართლობამ შეარყია მისი ჯანმრთელობა.

მოვუწოდებთ ხელისუფლებას, მის მიერ მართულ სუს-სა და მარიონეტ ადგილობრივი ხელისუფლების წარმომადგენლებს, სკოლაში პოლიტიკის ადგილი არ არის! ეს ადამიანები, მიუხედავად ხელისუფლებისგან მიტოვებისა, ღირსეულად ემსახურებიან ყველაზე მნიშვნელოვან საქმეს -მომავალი თაობის აღზრდას და მათზე მუქარა და ზეწოლა არ დარჩება რეაგირების გარეშე!

ჩვენ ყოველთვის დავიცავთ მათ ღირსებასა და უფლებებს!

31 ოქტომბრიდან ყველაზე მნიშვნელოვანი სწორედ სკოლების დეპოლიტიზება და ავტონომიური მართვის გაძლიერება იქნება."