ყველა უყურებს ერთ კაცს, იმ ერთ კაცს კი ეზარება და ძულს საქმის გაკეთება და არის ასე ქვეყანა გაჩერებული ჭაობში

ყველა უყურებს ერთ კაცს, იმ ერთ კაცს კი ეზარება და ძულს საქმის გაკეთება და არის ასე ქვეყანა გაჩერებული ჭაობში - გიგი უგულავა

პოლიტიკა - 18:14, 10 Oct, 2020

971

ევროპული საქართველოს ზუგდიდის მაჟორიტარობის კანდიდატი, გიგი უგულავა, ზუგდიდის მოსახლეობას კარდაკარის პრინციპით შეხვდა და მათი პრობლემები მოისმინა.

ადგილობრივების თქმით, მიუხედავად მრავალი პრობლემისა, ადგილობრივი ხელისუფლებისგან მუდმივი უყურადღებობაა.

გიგი უგულავას თქმით, სოციალურ და ეკონომიკურ პრობლემებთან ერთად არ არის გამართული მუნიციპალური ტრანსპორტი, რაც მოსახლეობას უზღუდავს შესაძლებლობას, რომ ქალაქის ცენტრში გადაადგილდნენ გვიანობამდე. უგულავამ აღნიშნა, რომ საჭიროა მედიათეკების ფუნქციონირება ქალაქში, რათა ახალგაზრდებს ჰქონდეთ ინფორმაციისა და განათლების მიღების საშუალება.

გიგი უგულავას თქმით, საჭიროა რომ ზუგდიდს ჰქონდეს რეალური თვითმმართველობა, რათა მოსახლეობამ თვითონ განსაზღვროს თუ რა არის მათთვის პრიორიტეტული.

„საჭიროა ამ ქალაქში შემოვიტანოთ მუნიციპალური ველოსიპედები, სკუტერები და ამავე დროს ვიფიქროთ ტრანსპორტის ისე ორგანიზებაზე, რომ ახლომდებარე სოფლებს შეეძლოთ გვიანობამდე დაკავშირება ქალაქთან.

ასევე მნიშვნელოვანი საკითხია მედიათეკები, რომელბმაც თბილისში გაამართლა, როდესაც ჩვენ ავაშენეთ 3 მედიათეკა, ხოლო ამ მთავრობამ ეს პროექტი გააჩერა. ეს არის უნიკალური თავშეყრის ადგილი ახალგაზრდებისა და მოხუცებისათვის, ინფორმაციისა და განათლების მიღების კარგი საშუალება. ჩვენ ვგეგმავთ, რომ ზუგდიდში აშენდეს 3 მედიათეკა.

ამავე დროს, ზუგდიდს უნდა დაუბრუნდეს თვითმმართველი ქალაქის სტატუსი და შესაბამისად, ის უნდა გახდეს ოფიციალურად რეგიონის ცენტრი. ამავდროულად, აუცილებელია, რომ ბიუჯეტიდან პირდაპირ, ავტომატურად, ადგილზე დარჩეს ფული, რათა ადგილობრივი ხელისუფლება არ იყოს დამოკიდებული ცენტრალურზე, არამედ იყოს დამოკიდებული ადგილობრივი მოსახლეობის ინტერესებზე და იყოს მორგებული მათ საჭიროებებზე.

ამ ყველაფერს სჭირდება გარდამტეხი ცვლილებები, რადგან დღეს ყველაფერი არის საპირისპიროდ აწყობილი, ყველა უყურებს ერთ კაცს, იმ ერთ კაცს კი ეზარება და ძულს საქმის გაკეთება და არის ასე ქვეყანა გაჩერებული ჭაობში, ვიქნევთ ხელებს და კიდევ უფრო ვეფლობით ჭაობში. ამიტომ არის გარდამტეხი ცვლილებები საჭირო აქ ზუგდიდში და მთლიანად საქართველოში.“ -აცხადებს უგულავა.