„ნაციონალური მოძრაობის“ ერთ-ერთი ლიდერის და გაერთიანებული ოპოზიციის გლდანის მაჟორიტარ ობის კანდიდატის ნიკა მელიას განცხადებით, მეზობელი ქვეყნების დეპარტამენტის სასაზღვრო ურთიერთობათა სამსახურის უფროსს ივერი მელაშვილს და საქართველოს შს სამინისტროს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორს ნატალია ილიჩოვას საერთო არ აქვთ ყბადაღებულ რუკებთან.

ნიკა მელიამ გლდანში, ამომრჩევლებთან შეხვედრისას განაცხადა, რომ მელაშვილი და ილიჩოვა ივანიშვილმა გაამწესა წინასწარ პატიმრობაში.

„არ შემიძლია სოლიდარობა არ გამოვუცხადო ჩვენ ღვაწლმოსილ მეცნიერებს, რომლებიც დააპატიმრა და წინასწარ პატიმრობაში გაამწესა ოლიგარქმა, მილიარდერმა ადამიანმა, რომელსაც მიაჩნია, რომ ამ აწმყოზე, წარსულზე და მომავალზე ბევრად უფრო მნიშვნელოვანი მისი საბანკო ანგარიშები და ფულია.

ჩვენ, მოსახლეობის უმრავლესობა ასე არ ვფიქრობთ. ბიძინა ივანიშვილი საკადრის პასუხს მიიღებს საარჩევნო უბნებთან. სოლიდარობა ჩვენ მეცნიერებს, ჩვენ გამო სხედან ისინი ციხეში. არაფერი საერთო არ აქვთ მათ ყბადაღებულ რაიმე რუკებთან“,-განაცხადა ნიკა მელიამ.