შეხვედრის მიზეზი დავით გარეჯის თემაზე მიმდინარე მოვლენებია. მხარეებმა არსებული სიტუაცია განიხილეს. შეხვედრას ესწრებოდა ბოდბელი მთავარეპისკოპოსი მეუფე იაკობი, რომელმაც მოგვიანებით ჟურნალისტებთანაც გააკეთა კომენტარი და განაცხადა, რომ დავით გარეჯის საქმეზე მიმდინარე გამოძიება აზერბაიჯანთან მეგობრულ ურთიერთობას არ დააზარალებს. კითხვაზე, იყო თუ არა გამოძიების დაწყების საფუძველი არქიმანდრიტ კირიონის ჩვენება, მეუფემ უპასუხა, რომ მხოლოდ ერთი სასულიერო პირის ჩვენების გამო არ დაიწყებოდა გამოძიება, თუ საქმეში სხვა მტკიცებულებები არ იდებოდა:

„სიტუაცია ისეთია, შეიძლება ადამიანის უდანაშაულობის პრეზუმცია დავარღვიო, ამიტომ ვერ გეტყვით, რამდენად შეესაბამება სიმართლეს დაკავებულების დანაშაულებრივი ქმედება, თუმცა, რაც შეეხება ვარიანტებს, ვერც ერთ ვარიანტს ვერ გამორიცხავ. არ ვიცი პოლიტიკური ელფერი ადევს თუ არა გამოძიების დაწყების საქმეს, ჩვენს ქვეყანაში სულ არჩევნებია და ვის როდის გაახსენდება ესა თუ ის საქმე, ყოველთვის არჩევნებს ვერ დაუკავშირებ. არ მგონია აქრიმანდრიტ კირიონის ჩვენების გამო იყვნენ დაკავებულები, პროცესი ცოტა ღია თუ იქნება, ვნახავთ რა და როგორ იყო, ვიღაცამ პროკურატურაში რაღაც თქვა და საქმე მაგის გამო აღიძრა - ასე არ ხდება. ეგ თავად მამა კირიონს უნდა ჰკითხოთ, როდის უთრხა სახელმწიფოს, თუ სხვამ უფრო ადრე უთხრა, მაშინ მამა კირიონს არ უნდა მოკითხოთ, უნდა მოკითხოთ სახელმწიფოს სხვადასხვა სტრუქტურებს. შესაძლოა, მამა კირიონმა მოითხოვა, დავით გარეჯის საკითხს წესიერად მიხედეთო, თორემ ეკლესია არავის არ აჭერინებს ხოლმე“ - განაცხადა მეუფე იაკობმა.

დავით გარეჯის საქმეში დევს არქიმანდრიტ კირიონის ჩვენება, შესაბამისად, საზოგადოებაში ჩნდება კითხვა, რა როლი აქვს ეკლესიას გამოძიების დაწყებასთან, თუმცა პროკურატურას განმარტებები ამ დრომდე არ გაუკეთებია.