წინა ხელისუფლებასთან პოლიტიკური ანგარიშსწორების მორიგი მცდელობა და ხელოვნურად წამოწყებული ავანტურისტული ქმედებები - "დამოუკიდებელ პოლიტიკურ ექსპერტთა ასოციაცია" ივერი მელაშვილის დაკავებასთან დაკავშირებით

პოლიტიკა - 11:11, 08 Oct, 2020

1189

საქართველო-აზერბაიჯანის საზღვრის დელიმიტაცია-დემარკაციის კომისიის ხელმძღვანელის - ივერი მელაშვილის დაკავებასთან დაკავშირებით - „დამოუკიდებელ პოლიტიკურ ექსპერტთა ასოციაციის“ თავმჯდომარემ - გელა კვაჭანტირაძემ გააკეთა შემდეგი განცხადება:

„დამოუკიდებელ პოლიტიკურ ექსპერტთა ასოციაციას მიაჩნია, რომ საქართველოს ხელისუფლების მიერ წინასაარჩევნო პერიოდის დასკვნით ეტაპზე წამოწყებული ეს აშკარად ავანტურისტული კამპანია, რომელიც ეხება საქართველო-აზერბაიჯანის საზღვრის დელიმიტაცია-დემარკაციის კომისიის 10 წლის წინანდელი სამუშაო პროცესის დეტალების სრულიად გაუგებარ რევიზიას, პროკურატურის მიერ სისხლის სამართლის საქმის აღძვრას და აღნიშნული კომისიის ხელმძღვანელის - ბ-ნი ივერი მელაშვილის დაკავებას, არის არჩევნებში ივანიშვილის ხელისუფლების მიერ მის მთავარ კონკურენტთან - წინა ხელისუფლების მმართველ პარტიასთან და მის ლიდერთან - საქართველოს მესამე პრეზიდენტთან - მიხეილ სააკაშვილთან პოლიტიკური ანგარიშსწორების მორიგი უპასუხისმგებლო მცდელობა.

მაშინ, როდესაც რეგიონში შექმნილია ძალიან საშიში, არასტაბილური ვითარება - მეზობელ სახელმწიფოებს - აზერბაიჯანს და სომხეთს შორის მიმდინარეობს შეიარაღებული კონფლიქტი, ამ დროს საქართველო-აზერბაიჯანის საზღვრის დელიმიტაცია-დემარკაციის კომისიის ხელმძღვანელობის მიმართ წამოყენებული ბრალდებები - თითქოსდა საქართველოს ტერიტორიების აზერბაიჯანისთვის უკანონოდ დათმობის გამო, გარკვეული კითხვის ნიშნის ქვეშ აყენებს კომისიის არა მხოლოდ ქართულ, არამედ გარკვეულწილად აზერბაიჯანულ მხარესაც, რაც ნამდვილად არ შეეფერება რეგიონში ჩვენს სტრატეგიულ პარტნიორთან - აზერბაიჯანთან ნდობის, კეთილმეზობლური და პარტნიორული ურთიერთობების სულისკვეთებას.

მიგვაჩნია, რომ მაშინ როდესაც მსოფლიოში და ჩვენს ქვეყანაში მძვინვარებს კორონა ვირუსის პანდემია, როდესაც ვიმყოფებით უმძიმეს ეკონომიკურ და სოციალურ კრიზისში და ქვეყანას საკმაოდ ბევრი სხვა შიგა პრობლემა გააჩნია, ამ დროს ხელისუფლების მიერ ამომრჩევლის ყურადღების სხვა თემებზე გადატანის მიზნით აშკარად ხელოვნურად წამოწყებული ასეთი ავანტურისტული ქმედებები ყოვლად დაუშვებელია და აჩენს ძალიან არასასურველ დამატებით რისკებს როგორც ქვეყნის საგარეო პოლიტიკის მიმართულებით, ასევე ჩვენი საზოგადოების კიდევ უფრო გახლეჩვის და ანტაგონიზმის გამწვავების თვალსაზრისით; ხოლო სამართალდამცავი ორგანოების გამოყენება კონკურენტებთან პოლიტიკური ანგარიშსწორების მიზნით, ძალიან მნიშვნელოვნად აზიანებს ქვეყანაში საარჩევნო გარემოს და პრაქტიკულად გამორიცხავს ოპოზიციური პოლიტიკური პარტიებსითვის მეტ-ნაკლებად ნორმალური კონკურენციის თეორიულ შესაძლებლობასაც კი.

მოვუწოდებთ ხელისუფლებას შეწყვიტოს სამართალდამცავი ორგანოების გამოყენება პოლიტიკურად მოტივირებული მიზნით. შეწყვიტოს ღრმა ისტორიაში ქექვა დაუსაბუთებელი - ხელოვნურად შეთითხნილი ბრალდებების ფაბრიკაციის მიზნით, დაუყონებლივ გაანთავისუფლოს საზღვრის დელიმიტაცია-დემარკაციის კომისიის დაკავებული წევრები და ქვეყანაში უზრუნველყოს ნორმალური საარჩევნო გარემოს შექმნა“.