საგარეო საქმეთა სამინისტროს მეზობელი ქვეყნების დეპარტამენტის, სასაზღვრო ურთიერთობათა სამსახურის უფროსის ივერი მელაშვილის ადვოკატი, ედუარდ მარიკაშილი აცხადებს, რომ მელაშვილი მისთვის წარდგენილ ბრალდებას არ აღიარებს და გამორიცხავს რაიმე ფორმით გამოძიებასთან თანამშრომლობას, რადგან მისთვის ეს ყველაფერი არის ძალიან დიდი შეურაცხყოფა.

„რაც შეეხება შემდგომ ნაბიჯებს, ამ ეტაპზე მოვითხოვ საქმის მასალების გადმოცემას და შემდეგ მოვემზადებით აღკვეთის ღონისძიებისთვის, სადაც ასევე ვთვლით, რომ არ არსებობს არანაირი საფუძველი იმისთვის, რომ ივერი მელაშვილი დარჩეს პატიმრობაში. მისი აზრით, ეს ყველაფერი უკავშირდება პოლიტიკურ მოვლენებს. ეს არის მისთვის ერთადერთი ახსნა იმისა, თუ რატომ შეიძლება დაწყებულიყო მის მიმართ სისხლის სამართლებრივი დევნა და ზოგადად ამ საქმის წამოწევა. თვითონ, რა თქმა უნდა, პოლიტიკურ პროცესში ჩართული არ არის, უბრალოდ, ეს არის ხელისუფლების მიერ წამოწეული თემა, რათა არჩევნებთან მიმართებაში ახალი საკითხები შექმნას. ასე თვლის ივერი მელაშვილი და თავს ამ ყველაფრის მსხვერპლად მიიჩნევს. მას არც ერთ შემთხვევაში არ აკავშირებს დანაშაულებრივი ქმედება, ვინაიდან ის პირნათლად ასრულებდა თავის მოვალეობას“, - აცხადებს ედუარდ მარიკაშვილი.